GST चा अर्थ तुम्हाला माहीत आहे का?

“G

ST” नामक वादळाने काही दिवसांपूर्वी सगळ्यांना हादरून सोडलं. काही लोकांना हा बदल आवडला तर काहींनी नाराजी व्यक्त केली. कारण या GST मुळे सगळ्यांच्याच आयुष्यात छोट्यामोठ्या प्रमाणात बदल झाले. GST ने सर्वांनाच हैराण केलं, हे काय कमी होतं की आता कलर्स मराठीवर देखील GST लागू होतो आहे. कलर्स मराठी GST एक्स्प्रेस घेऊन येत आहे. GST म्हणजे गायब सगळं टेन्शन. ही एक्सप्रेस सगळ्यांना १०० टक्के हसण्याची हमी देणार आहे. या कार्यक्रमामध्ये गायक आणि संगीतकार अवधूत गुप्ते मार्गदर्शकाच्या अथवा परीक्षकाच्या भूमिकेत दिसणार नसून तो कार्यक्रमाचा प्रथम प्रेक्षक असणार आहे. प्रियदर्शन जाधव आणि संदीप पाठक या कार्यक्रमाचे सूत्रसंचालन करणार आहेत. या कार्यक्रमाची निर्मिती संतोष काणेकर यांच्या अथर्व थिएटर्सने केली आहे. तसेच ज्ञानेश भालेकर यांनी या कार्यक्रमाचे दिग्दर्शन केले आहे.
दर्जेदार आणि निखळ विनोदाची मेजवानी देण्याचा हेतू लक्षात घेऊन हा कार्यक्रम प्रेक्षकांच्या भेटीस आणण्यात आला आहे. ‘कॉमेडीची GST एक्सप्रेस’ या कार्यक्रमामध्ये प्रेक्षकांना आशिष पवार, कमलाकर सातपुते, किशोर चौघुले, अदिती सारंगधर आणि प्राजक्ता हनमघर हे त्यांचे लाडके विनोदवीर पाहायला मिळणार आहेत. या विनोदवीरांबरोबरच प्रियदर्शन जाधव आणि संदीप पाठक कार्यक्रमाची रंगत अजूनच वाढवणार आहेत. या कार्यक्रमाविषयी बोलताना अवधूत गुप्ते सांगतात, “ पहिले गायक मग संगीत दिग्दर्शक त्यानंतर निर्माता, सूत्रसंचालक, परीक्षक अशा अनेक रोलमध्ये मी माझ्या मायबाप प्रेक्षकांना भेटलो आहे. हे प्रेक्षकच माझे गुरू आहेत आणि मार्गदर्शकदेखील आहेत. आज त्यांच्याच शुभेच्छा आणि प्रेम या दोन्ही गोष्टी बरोबर घेऊन मी माझा नवीन प्रवास सुरू करतो आहे याचा मला खूप आनंद होतो आहे. प्रेक्षकांना हसवणे खूप कठीण असते पण त्याला दाद देणे अगदीच सोपे असते आणि मी यावेळेस हाच सोपा मार्ग स्वीकारला आहे. या कार्यक्रमामध्ये मी मार्गदर्शकाची भूमिका वठवणार नसून प्रथम प्रेक्षक असणार आहे. मी कार्यक्रमामध्ये असलेल्या विनोदवीरांबरोबर हसणार आहे, गाणार आहे, त्यांच्या उत्तम विनोदांना दाद देखील देणार आहे. या कलाकारांना मी प्रोत्साहन देणार आहे.

Also Read : अवधूत गुप्ते स्वप्नील बांदोडकरला का म्हणतोय,'लेट्स बी फ्रेंड'!