‘सेल्फी’ मराठी नाटक आता, इंग्रजीमध्ये

शंभरी पार केलेले शिल्पा नवलकर लिखित ‘सेल्फी’ हे नाटक आता इंग्रजीमध्ये येणार आहे. एप्रिलमध्येच हिंदी रंगभूमीवरही ते आले होते. पारितोष पेन्टरने शिल्पा नवलकरकडून सेल्फीचे हिंदी आणि इंग्रजीचे अधिकार घेतले आहेत. या इंग्रजी नाटकाचे दिग्दर्शन आणि निर्मिती तनाझ इरानी यांनी केली आहे. यामध्ये तनाझ इरानी, डिंपल शहा, श्वेता गुलाटी, प्रिया मलिक आणि किश्वर मर्चंट या कलाकारांचा समावेश आहे. तीनही भाषांचा प्रेक्षक जरी वेगळा असला तरी मूळ विषय दमदार असल्यामुळे कोणत्याही भाषेमधल्या प्रेक्षकांच्या पसंतीस सेल्फी हे नाटक उतरेलच. इंग्रजी नाटकासाठी जॉय सिंग गुप्ता यांनी भाषांतर केले आहे. सेल्फीच्या लेखिका शिल्पा नवलकर म्हणाल्या, ‘‘इंग्रजी भाषेतही हे नाटक येतंय, याचा मला आनंदच होत आहे. प्रत्येक व्यक्तीने बघावं असं हे नाटक आहे. मराठीमध्येही या नाटकाला चांगला प्रतिसाद मिळतोय.’’
अजित भुरेने दिग्दर्शित केलेल्या या नाटकाचे अमेरिकेत महिनाभर प्रयोग झाले आहेत. आता सव्वाशेव्या प्रयोगाकडे वाटचाल सुरू आहे.