Crime: पत्नीचे परपुरुषाशी संबंध, अनेकदा समजावूनही ऐकेना; वैतागून पतीनं मुलीसह उचललं टोकाचं पाऊल!

Uttar Pradesh Unnao Crime News: उत्तर प्रदेशातील उन्नाव जिल्ह्यातून एक मन सुन्न करणारी घटना समोर आली.

उत्तर प्रदेशातील उन्नाव जिल्ह्यातून एक मन सुन्न करणारी घटना समोर आली. गंगाघाट कोतवाली परिसरातील सहजानी क्रॉसिंगजवळ एका ५० वर्षीय व्यक्तीने आपल्या १४ वर्षीय मुलीसह रेल्वेसमोर उडी मारून जीवन संपवले. या घटनेमुळे संपूर्ण परिसरात खळबळ उडाली असून,आत्महत्येपूर्वी लिहिलेल्या चिठ्ठीत पत्नीला जबाबदार धरण्यात आले आहे. याप्रकरणी पुढील तपास सुरू आहे.

दरम्यान, २३ फेब्रुवारीच्या रात्री ८:४५ वाजता रेल्वे ट्रॅकच्या कडेला दोन मृतदेह रक्ताच्या थारोळ्यात पडल्याची माहिती पोलिसांना मिळाली. मृतांची ओळख विकास गुप्ता (वय, ५०) आणि त्यांची मुलगी वेदिका (वय, १४) अशी पटली आहे. घटनास्थळापासून काही अंतरावर विकास यांची पांढऱ्या रंगाची कार आढळून आली. पोलिसांनी कारची झडती घेतली असता, एका मोबाईल फोनच्या मागे लपवलेली सुसाईड नोट सापडली. या चिठ्ठीत विकास यांनी आपल्या मृत्यूसाठी पत्नीला जबाबदार धरले आहे.

मिळालेल्या माहितीनुसार, पहिल्या पत्नीच्या निधनानंतर विकास यांनी डॉली नावाच्या महिलेशी दुसरे लग्न केले. मात्र, गेल्या काही काळापासून त्यांच्या संसारात वादाची ठिणगी पडली होती. मृताचा भाऊ शिवम उमर याने पोलिसांत दिलेल्या माहितीनुसार, विकासच्या पत्नीचे दुसऱ्या एका व्यक्तीशी प्रेमसंबंध होते आणि ती त्याच्यासोबत दुबईला पळून जाण्याच्या तयारीत होती. याच वादातून विकासने मुलीसह आत्महत्या केली. 

घटनेची गांभीर्याने दखल घेत पोलिसांनी डॉलीसह पाच जणांविरुद्ध गुन्हा दाखल केला. फॉरेन्सिक टीमने घटनास्थळावरून पुरावे गोळा केले असून मृतदेह शवविच्छेदनानंतर नातेवाईकांच्या ताब्यात देण्यात आले आहेत. आम्ही सुसाईड नोट आणि कुटुंबाने केलेले आरोप या दोन्ही बाजू पडताळून पाहत आहोत. शवविच्छेदन अहवाल आणि तांत्रिक पुराव्यांच्या आधारे निष्पक्ष चौकशी केली जाईल, अशी माहिती उन्नाव येथील एका पोलीस अधिकाऱ्याने दिली.