मुंबईतील एमसीए क्लब, बीकेसी येथे ‘महाराष्ट्र टेनिस क्रिकेट चॅम्पियन्स लीग’ (MTCCL) चा भव्य शुभारंभ पार पडला. या सोहळ्याला भारताचे माजी क्रिकेटपटू सुनील गावसकर, करसन घावरी आणि अमोल मजूमदार यांसारख्या मान्यवरांची उपस्थिती लक्षवेधी ठरली.
'लोकमत'चं WhatsApp चॅनल फॉलो करा!
लीगची रूपरेषा
एकनाथ सोलकर फाउंडेशन आणि रोज मर्क लिमिटेड यांच्या संयुक्त विद्यमाने आयोजित करण्यात आलेल्या या लीगमध्ये महाराष्ट्रातील पहिल्या प्रीमियर टेनिस क्रिकेट लीग अंतर्गत ८ संघांचा समावेश असणार आहे. आतापर्यंत या संघांचे ८ कर्णधार निश्चित झाले असून, उर्वरित खेळाडूंची निवड आगामी दिवसांत लिलाव पद्धतीद्वारे करण्यात येणार आहे.
बुमराहनं विकेट घेतली, सेलिब्रेशनही केलं! सायरन वाजल्यावर गावसकरांनी झापलं; नेमकं काय घडलं?
सन्मान आणि आदरांजली
या कार्यक्रमादरम्यान भारताच्या माजी क्रिकेटपटूंना सन्मानित करण्यात आले. तसेच, स्वर्गीय एकनाथ सोलकर यांना आदरांजली अर्पण करण्यात आली.
आयोजन आणि व्यवस्थापन
एकनाथ सोलकर फाउंडेशन आणि रोज मर्क लिमिटेड आयोजित या लीगला ITCSF चे संलग्नत्व असून, याचे संस्थापक ब्रिजेश सोलकर आणि भूपेंद्र सिन्हा आहेत, तर सहसंस्थापक भरत लोहार आणि प्रवीण घेवरी आहेत. कार्यक्रमाचे व्यवस्थापन अल्टिमेट इव्हेंट मेकर्सच्या पल्लवी नायर यांनी केले.
लीगची वैशिष्ट्ये
महाराष्ट्र टेनिस क्रिकेट चॅम्पियन्स लीग (MTCCL) ही टेनिस बॉलवर खेळली जाणारी एक प्रीमियम राज्यस्तरीय क्रिकेट लीग असून, यात फ्रँचायझी मॉडेल आणि खेळाडूंच्या लिलावाची प्रणाली अवलंबली जाणार आहे. २०२६ मध्ये सुरू होणाऱ्या पहिल्या सत्राचा मुख्य उद्देश महाराष्ट्रातील प्रतिभावान खेळाडूंना व्यासपीठ उपलब्ध करून देणे हा आहे. या लीगचे सामने DD Sports आणि Waves वर थेट प्रक्षेपित केले जाणार आहेत.
नोंदणी आणि अनावरण
खेळाडूंची नोंदणी Crickbro ॲपवर सुरू झाली असून, कार्यक्रमात ८ संघांचे लोगो, बक्षीस रक्कम आणि लीगची अधिकृत टी-शर्ट यांचे अनावरण करण्यात आले. याशिवाय, कर्णधार, मेंटर्स आणि मुख्य निवडकर्ते यांची घोषणा करण्यात आली. लीगच्या संस्थापकांकडून प्रमुख पाहुण्यांचा सत्कार करण्यात आला तसेच Crickbro प्लॅटफॉर्मचेही अनावरण करण्यात आले. ITCSFच्या सर्व सदस्यांनाही यावेळी सन्मानित करण्यात आले.
