उल्हासनगर महापालिकेत महापौर व उपमहापौर भाजपाचा की शिंदेसेनेचा? ३ फेब्रुवारीला विशेष सभा

मुंबई, ठाणे, कल्याण-डोंबिवलीसह उल्हासनगर महापालिकेच्या महापौर आणि उपमहापौर पदाचे चित्र स्पष्ट झालेले नाही. ३ फेब्रुवारी रोजी हे याबद्दल अंतिम निर्णय कळणार आहे.

- सदानंद नाईक, उल्हासनगर 
उल्हासनगर महापालिका महापौर व उपमहापौर निवडण्यासाठी ३ फेब्रुवारी रोजी विशेष सभा बोलावण्यात आली आहे. विशेष सभेसाठी पिठासीन अधिकारी म्हणून रत्नागिरीचे जिल्हाधिकारी मनुज जिंदल यांची पिठासीन अधिकारी प्राधिकृत करण्यात आले. महापौर भाजपचा की शिंदेसेनेचा याबाबत संभ्रम कायम असून भाजपने महायुतीचा महापौर होणार असल्याचे संकेत दिले.

उल्हासनगर महापालिका सार्वात्रिक निवडणुका पार पडल्या असून, कोणत्याच पक्षाला स्पष्ट बहुमत मिळाले नाही. ७८ पैकी भाजपाचे सर्वाधिक ३७ तर शिंदेसेनेचे ३६ नगरसेवक निवडून आले. वंचितचे-२, साई पक्ष-१ व अपक्ष-१ यांनी शिंदेसेनेला पाठिंबा दिल्याने, शिंदेसेनेने बहुमताचा ४० मॅजिक फिगर पूर्ण केला. तर काँग्रेस पक्षाचे अंजली साळवे यांनी तटस्थ राहण्याचे जाहीर केले. 

शिंदेसेनेने वंचित, साई व अपक्ष नगरसेवकाच्या पाठिंब्यामुळे बहुमताचा मॅजिक आकडा पूर्ण केल्याने, शिंदेसेनेचा महापौर होण्याचा मार्ग मोकळा झाला. महापौर पदी वर्णी लागण्यासाठी शिंदेसेनेतील ओबीसी नगरसेवकामध्ये चढाओड लागली आहे. 

दरम्यान दोन्ही पक्षाचे नगरसेवक नॉटरीचेबल आहेत. शिंदेसेनेच्या नगरसेवका सोबत वंचित, साई व अपक्ष नगरसेवक असल्याचे बोलले जात आहे. 

पिठासीन अधिकाऱ्याची निवड 

कोकण विभागीय आयुक्तांनी महापौर व उपमहापौर निवडणूक प्रक्रिया पार पाडण्यासाठी ३ फेब्रुवारी रोजी विशेष सभेचे आयोजन केले. पिठासीन अधिकारी म्हणून रत्नागिरीचे जिल्हाधिकारी मनुज जिंदल यांची नियुक्ती केली आहे. 

महापालिका महापौर व उपमहापौर निवडीसाठीचे वेळापत्रक लवकरकच प्रसिद्ध करणार आहेत. त्यानुसार निवड प्रक्रिया पार पडणार आहे. 

भाजपच्या गटनेते पदी राजेश वधारिया 

भाजपच्या ३७ नगरसेवकांची मंगळवारी कोकण विभागीय आयुक्तांकडे नोंदणी करण्यात आली असून, गटनेते पदी भाजपचे शहरजिल्हाध्यक्ष राजेश वधारिया यांची निवड करण्यात आली. यावेळी भाजपचे माजी जिल्हाध्यक्ष व निवडणूक प्रभारी प्रदीप रामचंदानी यांनी महापौर महायुतीचा होणार असल्याचे स्पष्ट केले.