Ichalkaranji Mayor: महापौर, उपमहापौर निवड बिनविरोधसाठी विरोधी आघाडीच्या नेत्यांसोबत चर्चा करणार - चंद्रकांत पाटील

सोमवारी (दि.९) निवडणूक प्रक्रिया पार पडणार

इचलकरंजी : उदय आनंदा धातुंडे यांची महापौरपदी, तर अनिल देवकरण डाळ्या यांचे उपमहापौरपदासाठी नाव निश्चित करण्यात आल्याची घोषणा राज्याचे उच्च व तंत्रशिक्षण मंत्री चंद्रकांत पाटील यांनी नगरसेवकांच्या बैठकीत केली.

ही निवड बिनविरोध करण्यासाठी विरोधी शिव-शाहू विकास आघाडीच्या नेत्यांसोबत चर्चा करणार असल्याचेही पाटील यांनी नमूद केले. महापौर व उपमहापौर नावाची घोषणा करण्यासाठी कल्लाप्पाण्णा आवाडे जनता बॅँकेच्या मुख्य शाखेत नगरसेवकांची बैठक झाली. 

पहिलीच महापौराची निवड असल्याने ती बिनविरोध करण्यासाठी शिव-शाहू आघाडीचे नेते मदन कारंडे यांच्याशी आपण स्वत: चर्चा करणार आहे. यासंदर्भात आमदार सतेज पाटील यांना विनंतीही करण्यात आली आहे. बिनविरोध निवड केल्यास विकासकामांमध्ये शिव-शाहू आघाडीला झुकते माप देण्यात येणार असल्याचे त्यांनी नमूद केले. 

आमदार राहुल आवाडे यांच्या उपस्थितीत धातुंडे व डाळ्या यांनी महापौर व उपमहापौरपदासाठी नगरसचिव राहुल पोटे यांच्याकडे उमेदवारी अर्ज दाखल केले. धातुंडे यांनी २ अर्ज दाखल केले असून, डाळ्या यांनी एक अर्ज दाखल केला आहे. संजय शिंदे या पिठासन अधिकाऱ्याच्या अध्यक्षतेखाली सोमवारी (दि.९) ही निवडणूक प्रक्रिया पार पडणार आहे.