'वडिलांनीच केलं लैंगिक शोषण, आई अन् मला...', अभिनेत्री, राजकारणी खुशबू सुंदरचा धक्कादायक खुलासा

दाक्षिणात्य अभिनेत्री आणि राजकारणी खुशबू सुंदर यांची राष्ट्रीय महिला आयोगाच्या सदस्यपदी नियुक्ती करण्यात आली आहे.

दाक्षिणात्य अभिनेत्री खुशबू सुंदर राजकारणातही सक्रिय आहे. कायम महिलांच्या अधिकारांवर भाष्य करणाऱ्या खुशबू सुंदर (Khushboo Sundar) त्यांच्या विधानांमुळे नेहमी चर्चेत असतात. त्यांची राष्ट्रीय महिला आयोगा सदस्य म्हणून निवड करण्यात आली.

खुशबू सुंदर यांनी एका मुलाखतीत त्यांच्या बालपणीच्या कटु आठवणी सांगितल्या आहेत आणि अनेक धक्कादायक खुलासे केले आहेत. वडिलांकडूनच कशाप्रकारे लैंगिक शोषण करण्यात आले याविषयी त्या मोकळेपणाने बोलल्या आहेत.

खुशबू सुंदर म्हणाल्या, मी ८ वर्षांची असतानाच माझं लैंगिक शोषण सुरु झालं. माझ्या वडिलांना वाटायचं की पत्नी आणि मुलांना मारहाण करणं हा त्यांचा अधिकार आहे. आपल्या एकुलत्या मुलीचं लैंगिक शोषणही करणं त्यांचा हक्क असल्याचं त्यांना वाटायचं.

मुलांसोबत जेव्हा गैरव्यवहार केला जातो तेव्हा कायम मुलाच्या मनात ते घर करुन राहतं. हे केवळ मुलगा किंवा मुलीसाठीच नाहीए. तर दोघांसाठी सारखंच आहे.

माझ्या आईचं वैवाहिक जीवन फार त्रासदायक होतं. मी १५ वर्षांची झाल्यानंतर वडिलांविरोधात आवाज उठवण्याचं धाडस माझ्यात आलं. मला वाटायचं आईने माझ्यावर विश्वासच नाही ठेवला तर ? कारण काहीही झालं तरी तिच्यासाठी पतीच परमेश्वर आहे.

मात्र मला जसंजसं कळायला लागलं मी याविरोधात आवाज उठवायला सुरुवात केली. वडिलांनी आम्हाला सोडून दिलं. आता रोज जेवायचं तरी कुठून अशी बिकट परिस्थिती ओढवली होती.

अभिनेत्री आणि राजकारणी खुशबू सुंदर यांनी २०२१ मध्ये रजनीकांत यांच्यासोबत 'अन्नात्थे' सिनेमात भूमिका केली होती. तर नुकतेच त्यांनी सुपरस्टार विजय च्या 'वारिसु' या सिनेमात कॅमिओ केला.

खुशबू यांनी 'द बर्निंग ट्रेन' चित्रपटातून बॉलिवूडमध्ये पाऊल ठेवलं होतं. तर २०१० मध्ये त्यांनी राजकारणात प्रवेश घेतला.