प्रेमकथेचा द्वैभाषिक मसाला

एक नायक असतो आणि एक नायिका असते, त्या दोघांचे प्रेम जुळते, पण एका कोणाच्या तरी घरून या प्रेमाला विरोध होतो, मग या दोन प्रेमीजिवांचा आटापिटा सुरू होतो. अशा प्रकारचा तोंडवळा हिंदी चित्रपटांनी पडद्यावर आणला आणि तेवढाच गाजवलासुद्धा. काही मराठी चित्रपटांची वाटचाल याच मार्गावरून होत असताना, हा फॉर्म्युला त्यात डोकावला नाही तर नवलच! अगदी त्यानुसार ‘कॅरी आॅन मराठा’ या चित्रपटात त्याचे प्रतिबिंब उमटलेले दिसते.
फक्त इथे वेगळेपण म्हणून मराठी व कानडी या दोन भाषांचा तडका व त्यात रंगलेल्या प्रेमकथेचा मसाला आहे. कोल्हापुरात स्वत:ची दुधाची डेअरी असलेला रांगडा नायक मार्तंड, दुधाचा टँकर कर्नाटकात घेऊन जात असताना रस्त्यात त्याची भेट कुसुम या कानडी मुलीबरोबर होते आणि तो तिला लिफ्ट देतो. प्रवासाच्या दरम्यान दोघांच्या गप्पा रंगतात आणि मार्तंड तिच्या प्रेमात पडतो. पण त्याचे हे प्रेम एकतर्फी असल्याचे पुढे सूचित होत जाते. त्यात पुन्हा मराठी मुलगा आणि कानडी मुलगी हा प्रकार अधिक तेढ निर्माण करतो. मुळातच कुसुमच्या घरात मराठीला विरोध असतो आणि त्याचे धागे भूतकाळात गुंतलेले असतात. साहजिकच यात पुढे अपेक्षित ताणतणावाची भर पडते. पण गोष्ट केवळ या दोघांच्या प्रेमातच अडकून पडत नाही; तर मार्तंडच्या आई-वडिलांची रहस्यमय कहाणी आणि कुसुमच्या पालकांच्या कथेचा ट्रॅकही समोर येत जातो. द्वैभाषिक प्रेमप्रकरण, नायक व खलनायकातला संघर्ष आणि भूतकाळातले संदर्भ जोडत ही गोष्ट साकार होते. कथा, पटकथा, दिग्दर्शन सांभाळलेल्या संजय लोंढे यांनी करमणूकप्रधान मसालापट दिला आहे.
मसालेदार तडका म्हटल्यावर ‘क’च्या बाराखडीतले प्रश्न विचारायचे नसतात. डोके बाजूला ठेवून चित्रपट फक्त एन्जॉय करायचा असतो. अर्थात, त्यांचीही तीच अपेक्षा आहे. या अपेक्षेनुसार चालल्यास चित्रपट मनोरंजन करण्याची खात्री देतो. चित्रपट पडद्यावर दिसतो मस्त; पण पटकथेवर अधिक काम झाले असते, तर हे सादरीकरण अजून दमदार झाले असते. पण हिंदी चित्रपटाचा लहेजा घेऊन आलेल्या या चित्रपटाचा, केवळ दोन घटका टाइमपास करणे उद्देश असेल, तर तो मात्र पूर्ण झाला आहे.

गश्मीर महाजनी याची चित्रपटातून नायक म्हणून धडाकेबाज एन्ट्री झाली आहे आणि त्याने ती सार्थकी लावली आहे. यानिमित्ताने अजून एक अ‍ॅक्शन हीरो तेवढा मराठी चित्रपटाला लाभला आहे. कश्मिरा कुलकर्णी हिने कन्नड भाषिक कुसुम आत्मविश्वासाने रंगवली आहे. यात ती दिसलीही सुंदर आहे आणि तिचे कानडी हेल काढत मराठी बोलणे कानाला खूप गोड वाटते.

कलाकार आणि भूमिका : चित्रपटात बरीच स्टारकास्ट आहे. उषा नाईक (अक्का), अरुण नलावडे (तात्या), शंतनू मोघे (सुदामा), अमेय कुंभार (बिट्टू), देविका दफ्तरदार (नंदिनी), किशोरी बल्लाळ (अम्मा), ओमकार कुलकर्णी (व्यंकटेश) यांच्यासह इतर सर्वच कलाकारांनी त्यांच्या भूमिकांमध्ये यथायोग्य रंग भरले आहेत. डोक्याला फार ताप नको असेल आणि जस्ट टाइमपास करायचा असेल, तर या मराठ्याला ‘कॅरी आॅन’ म्हणायला हरकत नाही.