कुलकर्णी गाजवतायत मराठी इंडस्ट्री

एंटरटेनमेंट इंडस्ट्री म्हटले की, ती एका माणसाच्या जिवावर चालत नाही. त्यात अनेक महत्त्वाचे घटक सामावलेले असतात. जसे की दिग्दर्शक, कलाकार, निर्माते, तंत्रज्ञ, स्पॉट बॉय, मेकअप

- मृण्मयी मराठे

एंटरटेनमेंट इंडस्ट्री म्हटले की, ती एका माणसाच्या जिवावर चालत नाही. त्यात अनेक महत्त्वाचे घटक सामावलेले असतात. जसे की दिग्दर्शक, कलाकार, निर्माते, तंत्रज्ञ, स्पॉट बॉय, मेकअप मन आणि असे अनेक. पण यातील प्रत्यक्षात पडद्यावर दिसतात किंवा ज्यांचे नाव सतत ऐकायला मिळते ते म्हणजे दिग्दर्शक, निर्माता आणि कलाकारांचे. ही मंडळी कलाकृतीतून आपल्यातील कसब पडद्यावर साकारतात. त्यामुळे त्या चित्रपटाबरोबरच त्यांचे नावही मोठे होते. जसे की बॉलीवूडमधील खान, कपूर अशी घरंदाज मंडळी आहेत. त्यांच्याशिवाय बॉलीवूड इंडस्ट्रीचे पानही हलत नाही, असे म्हणावे लागेल. तशीच काहीशी परिस्थिती आता मराठी इंडस्ट्रीतही तयार होत आहे. या खान, कपूर मंडळींप्रमाणेच मराठीत कुलकर्णीकरांचा सध्या बराच बोलबाला पाहायला मिळत आहे. या कलाकारांनी केवळ मराठीतच नाही, तर बॉलीवूड इंडस्ट्रीतही आपले नशीब अजमावले आहे आणि त्यात ते यशस्वीदेखील झाले आहेत.

अभिनेता अतुल कुलकर्णी यांनी ‘कैरी, भेट, वास्तुपुरुष, १० वी फ, देवराई, वळू, नटरंग, राजवाडे अँड सन्स’ हे मराठी, ‘सत्ता, चाँदनी बार, दम, रन, खाकी, पेज थ्री, रंग दे बसंती’ असे हिंदी, ‘भूमिगीता, यक्ष, अभिनेत्रे’सारखे कन्नड, ‘अंधारवाला, चंती, गोवरी, राम’सारखे तमीळ आणि ‘तालापावूम कुरूक्षेत्र’सारखे मल्याळम् अशा विविध भाषांमध्ये आपल्या अभिनयाची छाप पाडली आहे. इतकेच नाही, तर राजवाडे अँड सन्स चित्रपटातून अभिनयाबरोबरच निर्मितीक्षेत्रातही त्यांनी पदार्पण केले. त्यांच्या या कारकिर्दीत ‘हे राम आणि चांदनी बार’ या हिंदी तर ‘एद्गरिके’ या कन्नड चित्रपटासाठीदेखील सर्वोत्कृष्ट सहायक अभिनेता या राष्ट्रीय पुरस्कारांनी त्यांना गौरविण्यात आले होते.

अभिनेत्री सोनाली कुलकर्णी (सिनीअर) यांनी मराठीतील ‘मुक्ता, दोघी, कैरी, चैत्र, देवराई, गाभ्रीचा पाऊस, गंध, रिंगा रिंगा,
डॉ. प्रकाश बाबा आमटे, अगंबाई अरेच्चा २’, तर हिंदीतील ‘जहाँ तुम ले चलो, डॉ. बाबासाहेब आंबेडकर, दिल चाहता है,
वेल डन अब्बा, सिंघम्’ असे हिंदी, ‘ब्राइड अँड प्रिज्युडाईज’ हा इंग्लिश आणि ‘द गुड रोड’ हा गुजराथी चित्रपटही केला आहे. इतकेच नाही, तर ‘खतरों के खिलाडी आणि झलक दिखला जा’ या डान्स शोमध्येही आपण त्यांना पाहिले आहे. या हिंदी, मराठी, गुजराथी, इंग्लिश चित्रपटांच्या वाटचालीमध्ये ‘चैत्र’ चित्रपटासाठी राष्ट्रीय पुरस्कारातील स्पेशल ज्युरी अ‍ॅवॉर्ड देण्यात आले, तर मिलन इंटरनॅशनल फिल्म फेस्टिव्हलमध्ये ‘फुओको दि सु मे’ या चित्रपटातील त्यांच्या भूमिकेसाठी सर्वोत्कृष्ट अभिनेत्रीचा पुरस्कार त्यांना प्रदान करण्यात आला होता.

दिग्दर्शक उमेश कुलकर्णी यांनी ‘वळू, विहीर, देऊळ, हायवे : एक सेल्फी आरपार’ असे वेगळ्या धाटणीचे चित्रपट करून मराठी इंडस्ट्रीला वेगळ्या विषयावरील चित्रपटांची दखल घेण्यास भाग पाडले. लेखक, अभिनेता आणि निर्माता गिरीश कुलकर्णी यांनी ‘वळू, गाभ्रीचा पाऊस, गंध, विहीर, देऊळ, मसाला, पुणे ५२, पोस्टकार्ड, हायवे : एक सेल्फी आरपार’ या चित्रपटांतून स्वत:च्या अभिनयाची दखल घेण्यास भाग पाडले आणि अभिनयाबरोबरच यातील काही चित्रपटांची कथा, पटकथा, संवादही त्यांनी लिहिले आहेत. तर वळू चित्रपटाची निर्मिती करून त्यांनी तिहेरी भूमिका बजावली होती. यातील देऊळ या चित्रपटासाठी त्यांना सर्वोत्कृष्ट अभिनेता आणि सर्वोत्कृष्ट पटक थेसाठी राष्ट्रीय पुरस्कार देण्यात आला होता.

तर दुसरीकडे, ज्युनिअर सोनाली कुलकर्णीनेदेखील अल्पावधीतच मराठीसह हिंदीमध्येही आपला ठसा उमटवला आहे. ‘गाढवाचं लग्न, नटरंग, अजिंठा, झपाटलेला २, क्लासमेट्स, टाइमपास २, शटर’ या मराठी चित्रपटांसह ‘ग्रँड मस्ती आणि सिंघम्’ या हिंदी चित्रपटांतही तिचा अभिनय पाहायला मिळाला. ‘नटरंग’मधील तिची भूमिका आणि तिच्या नृत्याला विशेष पसंती मिळाली.