मला कवी होण्याची घाई नाही!

फॅन्ड्री, नटरंग, परतु रेती अशा अनेक चित्रपटांमध्ये वेगळ्या धाटणीचा अभिनय साकारणारे किशोर कदम आता गणवेश या सिनेमातून एका दमदार भूमिकेत प्रेक्षकांना पाहायला मिळणार आहेत. याच चित्रपटातील त्यांच्या भूमिकेविषयी त्यांनी सीएनएक्ससोबत साधलेला हा मनमोकळा संवाद...
प्रश्न : गणवेशमधील तुमच्या भूमिकेविषयी काय सांगाल?
 गणवेश या सिनेमामध्ये माझी एक वेगळी भूमिका आहे. यामध्ये स्मिता माझ्या बायकोचा रोल करीत आहे. परंतु ही फक्त आमच्या दोघांचीच गोष्ट नाही तर त्यामध्ये एका लहान मुलाची कथा आहे, मुक्ताची गोष्ट आहे, दिलीप प्रभावळकर यांची कथा आहे. म्हणजेच एकाच शहरात राहणाऱ्या प्रत्येक माणसाची एक गोष्ट आहे. ओळखीची माणसे कधी एकत्र येऊन काही गोष्टी घेऊन एकत्र करतात. त्यांचीच ही कहाणी आहे.
प्रश्न : गणवेशमध्ये तुमच्या भूमिकेत वेगळे असे काय आहे?
 फॅन्ड्रीमध्ये एक बाप होता अन् यातही एक बाप आहे; परंतु दोघे वेगळे आहेत. हा सिनेमा करताना मला माझ्या वडिलांची आठवण आली. कारण लहानपणी साधा गणवेश घेण्यासाठी माझ्या वडिलांना किती त्रास झाला असेल, हा विचार करून मी यातील बापाचा त्रास दाखविण्याचा प्रयत्न केला. हा चित्रपट केला नसता तर मला पुन्हा माझ्या बालपणाला रिव्हिजीट करता आले नसते.
प्रश्न : कवी अन् अभिनेता असताना एखाद्या चित्रपटाचे गीत आपण लिहावे, असे वाटले का?
 नटरंगमधील गाणी ऐकून मला वाटले यातील गाणी आपण लिहायला पाहिजे होती. गुरू माझा चांगला मित्र आहे. गुरूने लिहिलेले एखाद गाणे ऐकून माझ्यात एक पॉझिटिव्ह असूया निर्माण होते, की हे असे मला का नाही सुचले. आमच्यात एक हेल्दी कॉम्पिटिशन आहे.
प्रश्न : चित्रपटात कविता लिहिण्यासाठी आॅफर्स येतात का?
 हो येतात.. मी कविता लिहितोच, आता माझा दुसरा कवितासंग्रह येत आहे. बाऊल नावाचा. आता हा दहा वर्षांनी येतोय. आपल्याकडे दरवर्षी एक कवीचा कवितासंग्रह प्रकाशित झाल्याशिवाय तो कवी आहे, असे समजत नाहीत. मी एकाच पुस्तकाने बऱ्यापैकी सर्वांना माहीत झालो आहे. कवी होता येत नाही, कवी असतो किंवा नसतो. मला कवी होण्याची घाई झालेली नाही.
प्रश्न : मास अन् क्लास अशा दोन दर्जाच्या प्रेक्षकांसाठी चित्रपट तयार होतात, असे वाटते का तुम्हाला?
 सिनेमा चांगला असतो किंवा वाईट. तो कोण करतो अन् कसा करतो यावर ते डिपेन्ड असते. मास अन् क्लास हे ढोबळ वर्गीकरण करू नये. कितीतरी अशा चांगल्या फिल्म आहेत, ज्या लो बजेटमध्ये बनल्या अन् चालल्या. त्यामुळे असे वर्गीकरण योग्य नाही.