चित्रपटाची भव्यता चित्रपटगृहातच अनुभवा!

राकेश ओमप्रकाश मेहरा यांनी दिग्दर्शित केलेला मिर्ज़्या हा चित्रपट नुकताच प्रदर्शित झाला आहे. पण प्रदर्शनानंतर तीनच दिवसांत हा चित्रपट आॅनलाइन लीक झाला. चित्रपट लीक होणे ही बॉलीवूडची सध्या मोठी समस्या बनली आहे. याबाबत राकेश ओमप्रकाश मेहरा यांनी व्यक्त केलेले मत...
चित्रपट आॅनलाइक लीक होणे हे आपल्या फिल्म इंडस्ट्रीसाठी नवीन नाही. मिर्ज़्या हा चित्रपटही एका वेबसाईटवर नुकताच लीक झाला. मिर्ज़्या बनवण्यासाठी गेली कित्येक वर्षे मी मेहनत घेत आहे. त्यामुळे ही गोष्ट कळल्यावर मला प्रचंड धक्काच बसला होता. माझ्या काही मित्रमैत्रिणींनी मला फोन करून, मेसेज करून हे कळवले आणि लगेचच मी त्याविरोधात तक्रार दाखल केली. त्यानंतर चित्रपट वेबसाईटवरून काढून टाकण्यात आला. पण दोन तास तरी हा चित्रपट त्या वेबसाईटवर होता. त्यादरम्यान जवळजवळ 10 लाख लोकांनी हा चित्रपट डाऊनलोड केला. चित्रपट बनवताना अनेक जण मेहनत करतात. अशा प्रकारे चित्रपट लीक करून कोणाला आनंद मिळतो हा मला नेहमीच प्रश्न पडतो. चित्रपटक्षेत्राशी किंवा चित्रपटांशी काहीही संबंध नसलेल्या लोकांचाच यामध्ये समावेश असतो असे मला अनेकवेळा वाटते. मलेशिया, पाकिस्तान किंवा भारतातील छोट्या राज्यांतून चित्रपट लीक होत असल्याचे अनेकवेळा ऐकावयास मिळते. खरेतर, मिर्ज़्या हा चित्रपट चित्रपटगृहात पाहण्यात एक वेगळी मजा आहे. चित्रपटगृहात गेल्याशिवाय या चित्रपटाची भव्यता तुम्हाला अनुभवता येणार नाही. त्यामुळे हा चित्रपट लोकांनी चित्रपटगृहातच पाहावा असे मी त्यांना आवाहन करेन.
मिर्ज़्या हा चित्रपट माझ्यासाठी खूपच खास आहे. कारण मी व्ही. शांताराम यांना मी माझा गुरू मानतो. त्यांची कथा सांगण्याची पद्धत ही खूप वेगळी होती. त्यांच्या चित्रपटात गीत, संगीत हे कथा, कलाकार यांच्याइतकेच महत्त्वाचे असायचे. आपणही एखादा म्युझिकल चित्रपट बनवावा असे कित्येक दिवसांपासून माझ्या डोक्यात सुरू होते. ‘भाग मिल्खा भाग’सारखा बायोपिक बनविल्यानंतर एखादा म्युझिकल चित्रपट करावा असे वाटत असल्यानेच एक वेगळ्या पठडीतला चित्रपट मी बनवला. मिर्ज़्या या चित्रपटातही चित्रपटाच्या कथेइतकेच संगीताला महत्त्व देण्यात आले आहे. मिर्ज़्या या चित्रपटाला सध्या चांगल्या, वाईट दोन्ही प्रतिक्रिया मिळत आहेत. पण मी स्वत: या चित्रपटाच्या निर्मितीच्या बाबतीत प्रचंड खूश आहे. सैयमी खेर आणि हर्षवर्धन कपूर या दोन्ही नवोदित कलाकारांनी खूप चांगले काम केले आहे आणि त्यांच्या अभिनयासाठी सगळेच त्यांचे कौतुक करीत आहेत. या दोन्ही मुलांचा मला आज अतिशय अभिमान वाटत आहे. भाग मिल्खा भाग या चित्रपटाच्या वेळी फरहान अख्तरने जितकी मेहनत घेतली होती; तितकीच मेहनत हर्षवर्धनने या चित्रपटासाठी घेतली आहे हे मी आवर्जून सांगेन.
जगभरात अनेक चांगले चित्रपट बनवले जात आहेत. या चित्रपटांकडून आपल्याला शिकण्यासारखे खूप काही आहे. त्यामुळे मी चित्रपट बनवताना या चित्रपटांकडून नक्कीच प्रेरणा घेतो. मिर्ज़्याचे सध्या वेगवेगळ्या देशातील फेस्टिव्हलमध्ये स्क्रीनिंग होत आहे. सगळीकडे खूप चांगला रिस्पॉन्स मिळत आहे. मी नुकताच लंडनमधून परतलो आहे आणि आता बुसानला जाणार आहे. तेथील बुसान फिल्म फेस्टिव्हलमध्ये या चित्रपटाचे स्क्रीनिंग होणार आहे. त्यानंतर मी शिकागोला स्क्रीनिंगसाठी रवाना होणार आहे.