कॉन्ट्रोव्हर्सीचा चित्रपटाला फायदाच होतो

सुलतान या चित्रपटासाठी सलमान खान चांगलाच उत्सुक आहे. या चित्रपटाच्या निमित्ताने सीएनएक्सला मुलाखत देताना तो खूपच चांगल्या मूडमध्ये होता. मुलाखतीसाठी आल्यावर तो त्याच्याच जीत या चित्रपटातील अभी साँस लेने की फुरसत नही है, तुम मेरी बाहो में हो... हे गाणे गुणगुणतच आला. कॉफीचा घोट घेत घेत त्याने या मुलाखतीला सुरुवात केली. या चित्रपटाविषयी आणि त्याच्या कारकिर्दीविषयी त्याने सीएनएक्ससोबत भरभरून गप्पा मारल्या.

सुलतान चित्रपटात पहिल्यांदाच तू एका कुस्तीपटूची भूमिका साकारत आहेस, या चित्रपटाआधी तुला कुस्तीविषयी काही माहिती होती का?
माझ्या वडिलांकडून मी गामा या पहिलवानाविषयी लहानपणापासून ऐकले होते. दारासिंग यांच्या कुस्तीचे किस्से मी त्यांच्याकडून ऐकले आहेत. तसेच लहान असताना मी माझ्या वडिलांसोबत कुस्ती पाहायला जात असे. आमच्या इंदोरमध्ये तर माझे काका संध्याकाळच्या वेळात कुस्तीचा सरावही करत असत. त्यामुळे कुस्ती हा खेळ माझ्या खूप जवळचा आहे.

या चित्रपटासाठी तुला किती ट्रेनिंग घ्यावी लागली?
या चित्रपटात मी मातीतील कुस्ती, मॅटवरील कुस्ती असे कुस्तीचे वेगवेगळे प्रकार खेळलेलो आहे, त्यामुळे या प्रत्येक गोष्टीसाठी मला वेगवेगळी ट्रेनिंग घ्यावी लागली. काही कुस्तीपटू मला शिकवण्यासाठी खास सेटवर येत असत. तसेच मला डाएटही खूप करावे लागले. चित्रपटात मी वेगवेगळ्या आकारमानात दिसणार आहे. याचं चित्रीकरण करताना दिग्दर्शक अलीचे म्हणणे होते की, आपण सगळे चित्रीकरण दोन-तीन महिन्यांत करून घेऊया. त्यामुळे मी त्याला मस्करीत म्हणतदेखील असे की, तू तर कधी जिममध्ये गेला नाहीस, वजन वाढवणे आणि ते कमी करणे हे हलवा आहे, असे तुला वाटते का? दिवसभराचे चित्रीकरण झाल्यावर मी इतका थकलेला असायचो की, कधी झोपतो असे मला होत असे.

आज सुपरस्टार ही पदवी मिळाल्यानंतर इतकी मेहनत घेणे गरजेचे आहे असे तुला वाटते का?
माझ्या तरुणपणात मी इतकी मेहनत घेतली नसती तरी चालली असती. पण आज मी प्रत्येक भूमिकेत स्वत:ला ओतून देणे गरजेचे आहे. कारण याच वयात अनेक अभिनेत्यांची कारकीर्द संपताना मी पाहिलेली आहे. काही वर्षांपूर्वी एका चित्रपटातील माझा लूक पाहून माझे वय आता दिसायला लागलेय याची मला जाणीव झाली आणि त्यामुळे मी माझ्या शरीरावर, लूकवर अधिक मेहनत घ्यायला लागलो. मी मेहनत घेतली नाही तर माझी कारकीर्द लवकरच संपेल हे मला चांगलेच माहीत आहे.

सलमानचे चित्रपट म्हटले की ते 100 कोटींहून अधिक व्यवसाय करणारच असे म्हटले जाते, याविषयी तुला काय वाटते?
माझ्याच नव्हे तर सगळ्यांच्याच चित्रपटाने खूप चांगला व्यवसाय करावा असे मला वाटते. आपल्याकडे चित्रपटगृहांची संख्या कमी आहे, ती वाढल्यास तिकिटाचे दर तर कमी होतीलच त्याशिवाय पहिल्याच दिवशी 100 कोटींचा आकडा चांगला चित्रपट पार करू शकेल असे मला वाटते. या 100 कोटींच्या आकड्यात मला विशेषकरून सैराट या मराठी चित्रपटाचे कौतुक करायचे आहे. मराठी चित्रपटाचे तिकीट हे हिंदीपेक्षा कमी असूनही त्यांनी इतक्या कमी वेळात 100 कोटी कमावले आहेत. बॉलीवूडने प्रादेशिक चित्रपटांकडून शिकण्याची गरज आहे असे मला वाटते.

या चित्रपटासाठी तू हरयाणी भाषा शिकला आहेस का?
भाषा शिकण्यासाठी जितका वेळ लागतो, तितका माझ्याकडे नाहीये आणि मी आमीरसारखा परफेक्शनिस्टही नाहीये. त्यामुळे मला संवाद प्रोम्प्ट केले जायचे. माझ्या आईची मातृभाषा मराठी असूनही मला आजही चांगले मराठी बोलता येत नाही तर मी हरयाणी कुठून शिकू?

सुलतान या चित्रपटानंतर कुस्तीपटूंकडे पाहण्याचा दृष्टिकोन बदलेल असे तुला वाटते का?
कुस्तीपटूंना अतिशय सकस आहार लागतो. अनेकांना तो परवडतदेखील नाही. तसेच त्यांनी व्यायाम योग्यप्रकारे केला नाही तर उतारवायत त्याचा खूप त्रास होतो. त्यामुळे त्यांना योग्य ट्रेनिंग मिळणेही गरजेचे आहे. आपल्याकडे काही खेळ वगळता इतर खेळांना महत्त्व दिले जात नाही. सगळ्या खेळांना योग्य महत्त्व दिले जावे असे मला वाटते. मला आॅलिम्पिकचा ब्रँड अ‍ॅम्बेसेडर करण्यात आले त्यावरून अनेकांनी विरोध केला होता. पण माझ्यामुळे एखादा खेळ प्रसिद्ध होत असेल तर त्यात काय चुकीचे आहे आणि त्यातही मी स्पोर्ट्समन नाही असे त्यांनी म्हटले होते. मला सांगायला आवडेल की, मी शालेय जीवनात पोहण्यात अनेक पुरस्कार मिळवले आहेत.

तू चित्रपट निवडताना कोणत्या गोष्टीला महत्त्व देतोस?
पटकथा ऐकता क्षणीच ती मला आवडली तरच मी चित्रपट करतो. अरबाज, सोहेल, अतुल किंवा माझ्या कोणत्याही जवळच्या मित्राने जरी मला चित्रपटाबाबत विचारले तरी पटकथा ऐकल्यावरच मी निर्णय घेतो. पटकथा चांगली नसेल तर त्यांना मी चित्रपटासाठी नकारच देतो.

तुझ्या अनेक चित्रपटांच्या वेळी कॉन्ट्रोव्हर्सी झाली आहे, याचा चित्रपटावर काही परिणाम होतो असे तुला वाटते का?
कॉन्ट्रोव्हर्सीचा चित्रपटाला फायदाच होतो असे मला वाटते आणि कोणालाही कॉन्ट्रोव्हर्सीमुळे चित्रपट प्रदर्शित होऊ नये असे वाटत असेल तर त्यांनी पोलिसात जाऊन थेट तक्रार करावी. पण उगाचच चित्रपटगृहासमोर निदर्शने करून इतर लोकांना त्रास देऊ नये असे मला वाटते.

मला कोणी मिळतच नाही
सुलतान या चित्रपटाच्या चित्रीकरणाच्या वेळी सगळ्या वाईट गोष्टी मी सोडल्या होत्या, असे सलमान सांगतो. कॉफी आणि सिगारेटमध्ये वाईट असलेली कॉफी मी सोडली, असे तो मिश्कीलपणे म्हणाला. तर सिगारेट आणि दारूमध्ये सिगारेट सोडली. त्यानंतर दारू आणि स्त्रीमध्ये दारू सोडली. स्त्रीला सोडण्याचा प्रश्नच नाही कारण मला कोणी मिळतच नाही, असे म्हणत त्याने तो अजून तरी सिंगलच असल्याचे कबूल केले.

- prajakta.chitnis@lokmat.com