कोलकाता बलात्कार प्रकरणात आरोपींना पुढील मंगळवारपर्यंत पोलीस कोठडी

आरोपींना अलीपूर न्यायालयात हजर करण्यात आले असून, त्यांना पुढील मंगळवारपर्यंत पोलीस कोठडी सुनावण्यात आली आहे.

कोलकाता येथील एका लॉ कॉलेजमध्ये सामूहिक बलात्काराचा धक्कादायक प्रकार समोर आला आहे. पोलिसांनी या प्रकरणी एका माजी विद्यार्थ्याला आणि दोन विद्यमान विद्यार्थ्यांना अटक केली आहे. ही घटना २५ जून रोजी सायंकाळी ७:३० ते १०:५० दरम्यान कॉलेज कॅम्पसमध्ये घडली.

पीडितेने सांगितली आपबिती

पीडित २४ वर्षीय विद्यार्थिनीने दिलेल्या तक्रारीनुसार, तिला तीन आरोपींनी घेरले. त्यापैकी दोघांनी तिला तिसऱ्या आरोपीच्या खोलीत डांबले. यानंतर तिसऱ्या आरोपीने तिला शौचालयात ओढत नेत बलात्कार करण्याचा प्रयत्न केला. पीडितेने प्रतिकार करत त्याला रोखले आणि रडून विनवण्या केल्या. तिने एफआयआरमध्ये नमूद केले आहे की, "मी खूप प्रतिकार केला... रडत त्याला मला जाऊ देण्यास सांगितले... मी त्याचे पायही पकडले, त्याच्यासमोर हात जोडले, पण त्यांनी मला सोडले नाही."

कुणीच दया दाखवली नाही!

या भयानक घटनेबद्दल पीडितेने पोलिसांना सांगितले की, कॉलेजचे मुख्य गेट बंद होते आणि गार्ड असहाय्य होता, त्याने कोणतीही मदत केली नाही. यानंतर आरोपी तिला पुन्हा खोलीत घेऊन गेले आणि तिथेही तिने त्यांच्या पाया पडून सोडण्याची विनंती केली, पण त्यांनी ऐकले नाही. त्यानंतर आरोपींनी तिला जबरदस्तीने गार्डरूममध्ये नेले, जिथे त्यांनी तिचे कपडे काढून तिच्यावर सामूहिक बलात्कार केला. धक्कादायक बाब म्हणजे, बलात्कार सुरु असताना इतर दोन आरोपी पाहत होते आणि त्यांनी याचा व्हिडीओ देखील बनवला. आरोपींनी पीडितेला ब्लॅकमेल करत तिच्या मित्राला मारण्याची आणि तिच्या पालकांना अटक करण्याची धमकी दिली.

पोलिसांनी पीडितेच्या तक्रारीवरून तात्काळ एफआयआर दाखल करत तपास सुरू केला. या प्रकरणी मोनोजित मिश्रा (३१), झैब अहमद (१९) आणि प्रमित मुखर्जी (२०) या तिघांना अटक करण्यात आली आहे. मोनोजित मिश्रा हा महाविद्यालयाचा माजी विद्यार्थी असून, तृणमूल काँग्रेस छात्र परिषद (टीएमसीपी) युनिटचा अध्यक्ष असल्याचे समोर आले आहे.

आरोपींना अलीपूर न्यायालयात हजर करण्यात आले असून, त्यांना पुढील मंगळवारपर्यंत पोलीस कोठडी सुनावण्यात आली आहे. पोलिसांनी पीडितेची वैद्यकीय तपासणी केली असून, साक्षीदारांचे जबाब नोंदवले आहेत. तसेच, घटनास्थळाची पाहणी करून फॉरेन्सिक नमुने गोळा करण्यात आले आहेत. पोलिसांनी आरोपींचे मोबाईल फोन देखील जप्त केले आहेत. या घटनेमुळे कोलकाता शहरात खळबळ उडाली असून, महिलांच्या सुरक्षेचा प्रश्न पुन्हा ऐरणीवर आला आहे.