टी-२० वर्ल्ड कप २०२६ च्या सुपर-८ फेरीत दक्षिण आफ्रिकेविरुद्ध मिळालेल्या ७६ धावांच्या दारूण पराभवानंतर भारतीय गोटात तणावाचे वातावरण निर्माण झाले आहे. या मानहानीकारक पराभवानंतर कर्णधार सूर्यकुमार यादव प्रचंड नाराज दिसला. डगआऊटमध्ये त्याने हेड कोच गौतम गंभीर आणि सपोर्ट स्टाफसोबत जोरदार चर्चा केल्याचा व्हिडिओ सध्या सोशल मीडियावर तुफान व्हायरल होत आहे.
१८८ धावांच्या लक्ष्याचा पाठलाग करताना भारतीय फलंदाजी पत्त्याच्या बंगल्यासारखी कोसळली. संपूर्ण संघ १८.५ षटकात केवळ १११ धावांवर गारद झाला. या पराभवामुळे भारताचा सेमीफायनलचा मार्ग आता खडतर झाला आहे. सामन्यानंतर डगआऊटमध्ये सूर्या खूपच आक्रमक मूडमध्ये दिसला. गंभीरने आखलेली रणनीती फेल गेल्याने सूर्या नाराज असल्याचे बोलले जात आहे. व्हायरल व्हिडिओमध्ये सूर्या हातवारे करत गंभीर आणि इतरांशी काहीतरी गंभीर विषयावर बोलताना दिसत आहे.
बॅटर्स ठरले व्हिलन...
ईशान किशन: खातेही उघडू शकला नाही.
तिलक वर्मा: चुकीचा शॉट निवडून विकेट गमावली (१ धाव).
अभिषेक शर्मा: स्वस्तात बाद (१५ धावा).
शिवम दुबे: सर्वाधिक ४२ धावा केल्या, पण कोणाचीही साथ मिळाली नाही.
गोलंदाजीतील उणीवा
जसप्रीत बुमराहने सुरुवातीला ३ विकेट्स घेऊन आफ्रिकेला संकटात टाकले होते, पण डेव्हिड मिलर (६३) आणि डेवाल्ड ब्रेव्हिस (४५) यांनी भारतीय फिरकीपटूंना झोडून काढले. वरुण चक्रवर्तीने ४ षटकात तब्बल ४७ धावा बहाल केल्या.
आता 'करो या मरो'ची स्थिती
भारताला आता सेमीफायनल गाठण्यासाठी झिम्बाब्वे (२६ फेब्रुवारी) आणि वेस्ट इंडिज (१ मार्च) विरुद्धचे दोन्ही सामने कोणत्याही परिस्थितीत जिंकावेच लागणार आहेत. त्यात झिम्बाब्वे हा जायंट किलर संघ ठरला आहे. यामुळे भारताला सावध खेळी करावी लागणार आहे.
