ICC T20 World Cup 2026 India vs United States of America, 3rd Match : सूर्यकुमार यादवच्या धमाकेदार खेळीनंतर मोहम्मद सिराज, अक्षर पटेल आणि अर्शदीप सिंग यांनी गोलंदाजीच्या जोरावर USA वर पलटवार केला. मुंबईतील वानखेडेच्या मैदानात पहिल्यांदा फलंदाजी करताना भारतीय संघाने सूर्याच्या खेळीच्या जोरावर १६१ धावा करत USA समोर १६२ धावांचे टार्गेट सेट केले होते. भारताने पॉवरप्लेमध्ये धारदार गोलंदाजी करत फलंदाजीतील उणीव भरून काढली. मोक्याच्या क्षणी अक्षर पटेलनं महत्त्वपूर्ण विकेट्स घेतल्या. USA संघाला ८ बाद १३२ धावांवर रोखत भारतीय संघाने पहिला सामना २९ धावांनी जिंकला.
'लोकमत'चं WhatsApp चॅनल फॉलो करा!
टीम इंडियाच्या धुरंधरांचा फलंदाजी वेळी फ्लॉप शो, सूर्या एकटा पुरून उरला
मुंबईतील वानखेडेचं मैदान फलंदाजांसाठी नंदवन मानले जाते. त्यामुळे सलामीच्या सामन्यात भारतीय संघ पहिल्यांदा फलंदाजी मिळाली तर ३०० पारचा अशक्यप्राय आकडाही गाठू शकेल, अशी चर्चा क्रिकेट वर्तुळात रंगली होती. पण अमेरिकन गोलंदाजांनी ही चर्चा फोल ठरवली. अचूक टप्पा आणि चेंडूवरील उत्तम नियंत्रण ठेवत त्यांनी भारताच्या धुरंधरांना स्वस्तात माघारी धाडले. संघ अडचणीत असताना सूर्यकुमार मैदानात तग धरून थांबला. त्याने अमेरिकेच्या गोलंदाजीत सर्वात महागडा ठरलेल्या सौरभ नेत्रावळकरला टार्गेट केले. त्याचा हा प्लॅन यशस्वी ठरला अन् सूर्याच्या ४९ चेंडूतील ८४ धावांच्या नाबाद खेळीच्या जोरावर टीम इंडियाने निर्धारित २० षटकात १६१ धावांपर्यंत मजल मारली होती.
गोलंदाजीत सिराज, अर्शदीपनंतर पिक्चरमध्ये आला अक्षर पटेल अन्...
आघाडीच्या तिघे स्वस्तात माघारी फिरल्यावर मिलिंद कुमार आणि संजय कृष्णमूर्ती या भारतीय वंशाच्या USA च्या ताफ्यातील खेळाडूंनी मैदानात तगड धरला. जोडी धोकादायक ठरतीये, असे चित्र निर्माण झाल्यावर वरूण चक्रवर्तीनं मिलिंद कुमारला ३४ धावांवर चालते केले. अक्षर पटेलनं संजयला ३७ धावांवर बाद केले अन् भारतीय संघ सामन्यात आला. या दोघांशिवाय शुभमन रांजणे याने २२ चेंडूत ३७ धावांची खेळी केली. भारताकडून मोहम्मद सिराजनं सर्वाधिक ३ विकेट्स घेतल्या. अर्शदीप सिंग आणि अक्षर पटेल यांनी प्रत्येकी २-२ तर वरुण चक्रवर्तीनं एक विकेट आपल्या खात्यात जमा केल्या.
