PAK vs SL Final : पाकिस्तानी संघानं घरच्या मैदानात खेळवण्यात आलेल्या टी २० तिरंगी मालिकेत श्रीलंकेला पराभूत करत फायनल जिंकली. पण या सामन्यात पाक संघाच्या विजयापेक्षा सर्वाधिक चर्चा रंगली ती पाकिस्तानी खेळाडूंनी मैदानात पंचासोबत केलेल्या भांडणाची. या सामन्यात सलमान आगाच्या नेतृत्वाखालील पाकिस्तानने ६ विकेट्स राखून मालिका जिंकली. पण एका कॅचमुळे मैदानातील वातावरण चांगलेच तापल्याचे पाहायला मिळाले. पाकिस्तानच्या खेळाडूंनी श्रीलंकेविरुद्ध रडीचा डाव खेळला. पंचांनी चोरी पकडल्यावर पाक खेळाडूंनी भर मैदानात राडा घातला. इथं जाणून घेऊयात मैदानात नेमकं काय घडलं? त्यासंदर्भातील सविस्तर माहिती
'लोकमत'चं WhatsApp चॅनल फॉलो करा!
मैदानात नेमकं कधी अन् काय घडलं?
श्रीलंकेच्या डावाच्या १९ व्या षटकात शाहीन शाह आफ्रिदी गोलंदाजी करत होता. या षटकात त्याने टाकलेल्या धीम्या गतीच्या चेंडूवर दासुन शनाका याने फ्लिक शॉट खेळला. चेंडू बॅटची कड घेऊन हवेत उडाल्यावर फखर झमान याने मागे धावत जात झेल टिपण्याचा प्रयत्न केला. झेल घेऊन संघातील खेळाडूंनी विकेटचा जल्लोषही केला. पण पंचांनी श्रीलंकन बॅटरला नॉटआउट ठरवलं.
SMAT 2025 : अभिषेक शर्माचं वादळी शतक! गुरु युवीच्या रेकॉर्डशीही केली बरोबरी
पाकिस्तानी खेळाडू पंचासोबत भांडताना दिसले, पण...
फखर झमान याने अप्रतिम कॅच घेतला. पण चेंडू जमिनीला स्पर्श झाल्यामुळे शनाकाला पंचांनी नॉटआउट दिले. त्यानंतर फखर झमानसह शाहीन शाह आफ्रीदी आणि अन्य पाकिस्तानी खेळाडू पंचासोबत हुज्जत घालताना दिसले. पण पंच आपल्या निर्णयावर ठाम राहिले. आउट नसताना पाकिस्तानी खेळाडूंनी रडीचा डाव खेळण्याचा डाव फसला. मैदानात जे घडलं त्याचा व्हिडिओ सोशल मीडियावर तुफान व्हायरल होताना दिसत आहे.
श्रीलंकेच्या संघाकडून एकाच अर्धशतक, पाकिस्तानी ताफ्यातून गोलंदाजीत आफ्रिदीसह मोहम्मद नवाझ चमकला
या सामन्यात नाणेफेक गमावल्यावर पहिल्यांदा फलंदाजी करताना श्रीलंकेचा संघ ११४ धावांत आटोपला. कमिल मिशारा याने केलेल्या ५९ धावा वगळता एकालाही फलंदाजीत धमक दाखवता आली नाही. पाकिस्तानकडून शाहीन अफरीदी आणि मोहम्मद नवाझ यांनी प्रत्येकी ३-३ विकेट घेतल्या. पाकिस्तानच्या संघाने या धावांचा पाठलागग करताना ६ विकेट आणि ८ चेंडू राखून विजय नोंदवला.
