इंग्लंडविरुद्धच्या पहिल्या टी-२० सामन्यात कार्यवाहू कर्णधाराच्या रुपात मैदानात उतरून स्मृती मानधना हिने दमदार शतकी खेळी केली. टी-२० कारकिर्दीतील पहिले शतक साजर करताच स्मृती मानधनाच्या नावे खास विक्रमाची नोंद झाली आहे. क्रिकेटच्या तिन्ही प्रकारात शतक झळकवणारी ती पहिली भारतीय महिला क्रिकेटर ठरली आहे.
'लोकमत'चं WhatsApp चॅनल फॉलो करा!
नॉटिंघमच्या ट्रेंड ब्रिज स्टेडियमवर रंगलेल्या सामन्यात इंग्लंडच्या संघाने नाणेफेक जिंकून पहिल्यांदा गोलंदाजी करण्याचा निर्णय घेतला. हरमनप्रीत कौरच्या अनुपस्थितीत भारतीय संघाचे नेतृत्व करणाऱ्या स्मृती मानधनाने शफाली वर्माच्या साथीनं भारताच्या डावाची सुरुवात केली. पहिल्या विकेटसाठी दोघांनी ७७ धावांची भागादीरी रचत इंग्लंडचा निर्णय फोल ठरवला. त्यानंतर स्मृती मानधनाने ५१ चेंडूत शतक साजरे केले. महिला आंतरराष्ट्रीय टी-२० क्रिकेटमधील ही पाचव्या क्रमांकाची जलद शतकी खेळी ठरली.
स्मृती मानधनानं मोडला हरमनप्रीत कौरचा विक्रम
स्मृती मानधना हिने आपल्या टी-२० कारकिर्दीतील पहिल्या शतकी खेळीसह क्रिकेटच्या छोट्या प्रकारात मोठी खेळी करण्याचा विक्रमही आपल्या नावे केला आहे. याआधी टी-२० क्रिकेटमध्ये भारतीय महिला संघाकडून सर्वोच्च धावसंख्येचा विक्रम हा नियमित कर्णधार हरमनप्रीत कौरच्या नावे होता. २०१८ मध्ये तिने न्यूझीलंड विरुद्धच्या सामन्यात १०३ धावांची खेळी केली होती. इंग्लंड विरुद्धच्या सामन्यात ११२ धावांच्या खेळीसह स्मृतीनं नवा विक्रम सेट केलाय.