सांगली महापालिकेतील भाजप सत्तेतच्या श्रीगणेशालाच गटबाजीचा भडका, सभापती निवडीने अंतर्गत मतभेद चव्हाट्यावर

आमदार-महापौरांत दुरावा

शीतल पाटील

सांगली : महापालिकेत भाजपची सत्ता स्थापन झाल्यानंतर एकजूट दिसेल अशी अपेक्षा होती. मात्र प्रत्यक्षात नेते आणि पदाधिकाऱ्यांमधील दुरावा वाढत असल्याचे चित्र समोर येत आहे. सभापती निवडीवेळी हा अंतर्गत संघर्ष उघडपणे दिसून आला. त्यातच भाजपचे आमदारसुधीर गाडगीळ व महापौर धीरज सूर्यवंशी यांच्यातील राजकीय दरीही रुंदावल्याचे दिसत आहे. सत्ताधारी पक्षात कलह निर्माण झाल्याने गटबाजीचा भडका उडाला आहे.

गेल्या वर्ष-दीड वर्षात भाजपतर्गंत वेगवेगळे गट कार्यरत आहेत. निवडणुकीपूर्वी आमदार गटाने निष्ठावंताचा मुद्दा उपस्थित करीत गटबाजी पहिल्यांदा चव्हाट्यावर आणली. त्यानंतर महापालिका निवडणुकीत उमेदवारी यादीवरून दोन्ही गटात शह-कटशहाचे राजकारण रंगले होते. त्याचा फटका भाजपला बसला. गतवेळी बहुमतात असलेली भाजप यंदा काठावर पास झाली. त्यानंतर महापौर निवडीवेळीही थोडा संघर्ष झाला होता. पण तो चव्हाट्यावर आला नाही. 

पालकमंत्री चंद्रकांत पाटील यांनी महापौर-उपमहापौर निवडीची सुत्रे हाती घेतली. पण आता विषय समित्यांच्या सभापतिपदावरून भाजपगर्तंत कलह समोर आला आहे. सभापती पदासाठी नाव निश्चित करताना नेत्यांच्या गटाकडून आपापल्या समर्थकांना संधी मिळावी यासाठी जोरदार प्रयत्न करण्यात आले. त्यातून महापालिकेतील प्रमुख विरोधी पक्ष असलेल्या काँग्रेसला सभापतीपद देण्यावरून महापौरांसह काही पदाधिकारी नाराज झाले.

महापालिकेच्या सातही समितीवर भाजप व राष्ट्रवादी (अजित पवार) युतीचे वर्चस्व आहे. विशेषत: प्रभाग समितीत बहुमत आहे. तरीही विरोधी काँग्रेसला एक सभापती देण्याचे कारण काय? असा सवाल उपस्थित करण्यात आला. त्यातही महापौरांचीच प्रभाग समिती एक काँग्रेसला देण्यात आली. या समितीच्या सभापतिपदासाठी महापौरसमर्थक रईसा शिकलगार यांनी अर्ज दाखल केला होता. निवडीवेळी त्यांचा अर्ज मागे घेण्यात आला. त्यामुळे पक्षांतर्गत नाराजी आणखी वाढली.

भाजपने महापालिकेत सत्ता मिळवली असली तरी नेतृत्वातील समन्वयाचा अभाव अधोरेखित होत आहे. पद वाटप आणि निर्णय प्रक्रियेत काहींची मते डावलली जात असल्याची तक्रार कार्यकर्त्यांतून पुढे येत आहे. त्यामुळे पक्षातील दोन गटांमधील तणाव वाढल्याचे स्पष्ट दिसत आहे. दरम्यान, पक्षातील ज्येष्ठ नेते या मतभेदांवर पडदा टाकण्याचा प्रयत्न करत असले तरी सभापती निवडीच्या निमित्ताने उफाळून आलेले नाराजी नाट्य थांबण्याची चिन्हे सध्या तरी दिसत नाहीत. आगामी काळात पदवाटप, समित्या आणि धोरणात्मक निर्णयांवरून ही गटबाजी अधिक तीव्र होण्याची शक्यता राजकीय वर्तुळात व्यक्त केली जात आहे.

महापौरांची अनुपस्थिती चर्चेत

सभापती निवडीवेळी महापौर धीरज सूर्यवंशी महापालिकेत थांबून होते. प्रभाग समिती एकच्या निवडीसाठी ते बैठकीला हजर होते. पण काही वेळानंतर सभापतींच्या सत्कारासाठी आमदार सुधीर गाडगीळ महापालिकेत आले. ते थेट स्थायी सभापतींच्या दालनात गेले. तिथे पाचही सभापतींचा सत्कार करण्यात आला. स्थायी सभापतींना खुर्चीवरही बसविले. फोटोसेशनही झाले. पण साऱ्यात कुठेच महापौरांची उपस्थितीत नव्हती. महापौरांची गैरहजेरीचा मुद्दाही नेत्यांच्या निदर्शनास आणून देण्यात आला. पण त्यांनी हसत तो टाळला.

सत्तेच्या श्रीगणेशालाच गटबाजीची किनार

महापौर-उपमहापौर निवडीवेळीही भाजपचे काही नेते अनुपस्थित होते. महापौरांनी पदभार स्वीकारल्यानंतरही काहींनी त्यांना शुभेच्छाही दिल्या नसल्याचे समर्थक सांगतात. त्यामुळे आता सभापती निवडीवेळी महापौरांनी घेतलेल्या भूमिकेचेही समर्थन केले जात आहे. त्यात सभापती निवडीसाठी शहरात लावलेल्या डिजिटल फलकावरून महापौरांचा फोटो गायब आहे. सत्तेच्या श्रीगणेशालाच भाजपमध्ये गटबाजीची किनार स्पष्टपणे दिसून येत आहे.