उन्हाळ्याचा सिझन आणि या सिझनमध्ये मिळणारी आंबट - गोड कैरी म्हणजे अस्सल खवय्यांसाठी पर्वणीच... हिरव्यागार कैरीची आंबट - गोड चव सगळ्यांनाचं वेड लावते. कैरीचं पन्हं, चटणी किंवा लोणचं आपण नेहमीच खातो, पण या कैरीच्या सिझनमध्ये भूक तृप्त करण्यासाठी जेव्हा ताटात गरमागरम 'कैरीचं पिठलं' येतं, तेव्हा जेवणाची लज्जत काही वेगळीच असते. पारंपारिक पिठल्याला कैरीचा आंबट तडका देऊन बनवलेला हा पदार्थ केवळ चविष्टच नाही, तर तोंडाची चव वाढवणारा आहे. गरमागरम भाकरी, कांदा आणि सोबतीला कैरीचं हे झणझणीत पिठलं असेल, तर दोन घास जास्तच जातात(How To Make Kairicha Pithale At Home).
उन्हाळ्याच्या दिवसात भाजीला काय करावं हा प्रश्न पडला असेल, तर 'कैरीचं पिठलं' हा एक उत्तम आणि झटपट होणारा पर्याय आहे. साध्या पिठल्याला जेव्हा कैरीची आंबट - गोड चव मिळते, तेव्हा त्याची चव दुपटीने वाढते. कडक उन्हात जेव्हा काहीच सुचत नाही, तेव्हा हा 'गावरान बेत' जिभेची चव तर वाढवतोच, सोबतच मनही तृप्त करतो. बेसनाचा दाटसरपणा आणि कैरीचा तो आंबट तडका असा काही जमून येतो की, जेवताना भाजीची गरजच भासत नाही. झटपट तयार होणारं आणि कमी साहित्यात बनणारं हे पिठलं भाकरी किंवा भातासोबत अप्रतिम लागतं. लसणाची फोडणी, हिरवी मिरची आणि किसलेल्या कैरीचा स्वाद यामुळे हे पिठलं (Kairicha Pithale Recipe) घराघरात लोकप्रिय आहे. यंदाच्या उन्हाळ्याचा आनंद द्विगुणित करण्यासाठी कैरीच्या पिठल्याची सोपी आणि टेस्टी रेसिपी पाहूयात.
साहित्य :-
१. तेल - १ ते २ टेबलस्पून
२. जिरे - १ टेबलस्पून
३. मोहरी - १ टेबलस्पून
४. हिंग - चिमूटभर
५. कडीपत्ता - ४ ते ५ पाने
६. लसूण - ६ ते ७ पाकळ्या
७. हिरव्या मिरच्या - ४ ते ५ मिरच्या
८. हळद - १/२ टेबलस्पून
९. मीठ - चवीनुसार
१०. कैरीचा किस - १ कप
११. बेसन - १/२ कप
१२. कोथिंबीर - २ ते ३ टेबलस्पून (बारीक चिरलेली)
१३. कांदा - १ कप (बारीक चिरलेला)
कृती :-
१. सगळ्यात आधी एका कढईत तेल घेऊन त्यात फोडणीसाठी जिरे, मोहरी, हिंग, कडीपत्ता, हिरव्या मिरच्या, लसूण असे सगळे जिन्नस घालून खमंग अशी फोडणी तयार करावी. (फोडणीत आपण नेहमीच्याच पिठल्याप्रमाणे व आपल्या आवडीनुसार बारीक चिरलेला कांदा देखील घालू शकता.)
२. त्यानंतर तयार फोडणीत कैरीचा किस आणि चवीनुसार मीठ, हळद घालावी.
३. बेसन पिठात पाणी घालून त्याचे पातळसर असे मिश्रण तयार करून घ्यावे. तयार फोडणीत हे बेसन पिठाचे मिश्रण घालूंन चमच्याने सतत हलवत राहावे गुठळ्या झाल्यास त्या मोडून घ्याव्यात.
४. त्यानंतर या पिठल्यात वरुन बारीक चिरलेली कोथिंबीर भुरभुरवून घ्यावी. झाकण ठेवून एक हलकीशी वाफ काढावी.
कैरीच्या आंबट - गोड चवीचं मस्त गरमागरम पिठलं खाण्यासाठी तयार आहे. वाफाळता भात किंवा भाकरीसोबत आपण हे चटपटीत चवीचं पिठलं खाऊ शकता.