PMC Election Results 2026: पुणेकरांनी अजित पवारांचा वादा नाकारला; निवडणुकीतील ५ निर्णायक मुद्दे, भाजपच्या व्हिजनला पसंती

PMC Election Results 2026 पुणे आणि पिंपरी चिंचवड महापालिकेची निवडणूक दोन्ही राष्ट्रवादीने एकत्र येत आघाडीच्या माध्यमातून लढवली. मात्र, ही आघाडी मतदारांनी नाकारल्याचे निकालावरून स्पष्ट झाले.

पुणे : पुणे महापालिका निवडणुकीत भाजपला ऐतिहासिक विजय मिळाला आहे. पुण्याच्या इतिहासातील सर्वांधिक १२० जागा मिळविण्याचा विक्रम भाजपने केला आहे. महापालिका निवडणूक प्रचारादरम्यान भाजप आणि राष्ट्रवादी काँग्रेसमध्ये आरोप-प्रत्यारोपाच्या फैरी झडल्या. उपमुख्यमंत्री अजित पवार यांनी राष्ट्रवादीच्या संयुक्त जाहीरनाम्यामध्ये पुणेकरांना मेट्रो आणि पीएमपीचा मोफत प्रवास देण्याचा वादा केला. मात्र, भाजपला घवघवीत यश मिळाल्याने राष्ट्रवादीचा वादा पुणेकरांनी नाकारल्याचे स्पष्ट झाले आहे.

 भाजपच्या व्हिजनला पसंती

मुख्यमंत्री देवेंद्र फडणवीस यांच्यासह भाजपच्या नेत्यांनी महापालिकेच्या माध्यमातून आणि शासनाच्या माध्यमातून शहरात राबवलेल्या प्रकल्पांचा पाढा वाचत पुढील पाच वर्षांत केल्या जाणाऱ्या प्रकल्पांचे व्हिजन मांडले. या व्हिजनला पुणेकरांनी पसंती देत महापालिकेच्या पारड्यात शंभरपेक्षा अधिक जागा टाकल्या आहेत.

 दोन्ही राष्ट्रवादीची आघाडी नाकारली

उपमुख्यमंत्री अजित पवार यांनी शरद पवार यांच्यापासून फारकत घेत भाजपसोबत घरोबा करून राज्यात सत्तेत वाटा मिळवला. त्यानंतर वारंवार दोन राष्ट्रवादी एकत्र येण्याच्या चर्चा रंगल्या. लोकसभा आणि विधानसभा निवडणुकीत दोन राष्ट्रवादी एकमेकांच्या विरोधात लढल्याने आंतर वाढले होते. मात्र, राज्यातील नगरपरिषदांच्या निवडणुकीत दोन्ही पक्षांना फटका बसल्यानंतर पुणे आणि पिंपरी चिंचवड महापालिकेची निवडणूक दोन्ही पक्षांनी एकत्र येत आघाडीच्या माध्यमातून लढवली. मात्र, दोन पक्षांची ही आघाडी मतदारांनी नाकारल्याचे निकालावरून स्पष्ट होते.

 काँग्रेसची चमकदार कामगिरी

महापालिकेच्या २०१७ सालच्या निवडणुकीत काँग्रेस पक्षाला नऊ जागा मिळाल्या होत्या, तर एक काँग्रेस पुरस्कृत उमेदवाराचा विजय झाला होता. महापालिकेची ही निवडणूक महाविकास आघाडीच्या माध्यमातून लढवण्याच्या हालचाली सुरू होत्या. मात्र, निवडणुकीच्या तोंडावर राष्ट्रवादी(शरद पवार) ने काँग्रेस व उद्धवसेनेपासून फारकत घेत अजित पवार यांच्यासोबत घरोबा केला. यानंतर काँग्रेसने उद्धवसेनेला सोबत घेत निवडणूक लढवली. या निवडणुकीत काँग्रेसने चमकदार कामगिरी करत १५ जागांवर विजय मिळविला.

 दोन्ही शिवसेनासह मनसेवर अविश्वास

महापालिकेच्या निवडणुकीसाठी उद्धवसेनेने काँग्रेससह मनसेला सोबत घेतले. काही ठिकाणी काँग्रेस, तर काही ठिकाणी मनसेला साथ देत दुहेरी फायदा मिळविण्याचा प्रयत्न केला. मात्र, उद्धवसेनेचा हा प्रयोग मतदारांच्या पचनी पडला नाही. त्यामुळे उद्धवसेनेला केवळ एका जागेवर समाधान मानावे लागले, तर मनसेचा भोपळाही फुटला नाही. दुसरीकडे शिंदेसेनेने भाजप देत असलेल्या १५ जागा नाकारून स्वबळावर निवडणूक लढवली. मात्र, हा निर्णय त्यांच्या अंगलट आल्याने एकही जागा जिंकता आली नाही.