महापाालिका निवडणुकीत पराभूत झाल्याने कुटुंबाला शिवीगाळ;भाजप उमेदवाराच्या समर्थकांविरोधात गुन्हा

कुटुंबीयांना शिवीगाळ करून धमकी दिल्याची घटना भवानी पेठेत घडली. याप्रकरणी चौघांविरोधात खडक पोलिस ठाण्यात गुन्हा दाखल करण्यात आला आहे.

पुणे : महापालिका निवडणुकीत पराभूत झाल्याने भारतीय जनता पक्षाच्या उमेदवाराच्या समर्थकाने तरुण, तसेच त्याच्या कुटुंबीयांना शिवीगाळ करून धमकी दिल्याची घटना भवानी पेठेत घडली. याप्रकरणी चौघांविरोधात खडक पोलिस ठाण्यात गुन्हा दाखल करण्यात आला आहे.

याबाबत गणेश शिवाजी लडकत (५३, रा. भवानी पेठ) यांनी खडक पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, मंदार लडकत, प्रीतम बनकर, रोहित शिंदेश आणि प्रज्ञा लडकत यांच्याविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, महापालिकेच्या भवानी पेठ-कासेवाडी प्रभागातून गणेश लडकत यांचे चुलतभाऊ भारतीय जनता पक्षाचे उमेदवार संदीप लडकत पराभूत झाले. तक्रारदाराच्या कुटुंबाने लडकत यांच्याविरोधात प्रचार केल्याने त्यांचा पराभव झाला, असे वाटल्याने आरोपी शुक्रवारी लडकत यांच्या घरात शिरले. लडकत आणि त्यांच्या कुटुंबीयांना शिवीगाळ करून धमकी दिली, असे लडकत यांनी फिर्यादीत म्हटले आहे. या प्रकरणाचा पुढील तपास सहायक पोलिस निरीक्षक हर्षल कदम करत आहेत.