PCMC Election 2026: त्यांच्या हातात सत्ता गेली तर शहराचा खेळखंडोबा; आपल्याला भ्रष्टाचाऱ्यांचा ‘आका’ संपवायचा - अजित पवार

PCMC Election 2026 ग्रीन बॉण्ड नावाखाली २०० कोटींचे कर्जरोखे काढले आहेत, त्यांनी लोकांची घरेदारे पाडली, रस्त्यावर आणले.

पिंपरी: आगामी महानगरपालिका निवडणुकांच्या पार्श्वभूमीवर पिंपरी चिंचवडमध्ये राष्ट्रवादी काँग्रेस पक्षाच्या अधिकृत उमेदवारांच्या प्रचारार्थ आयोजित सभेत उपमुख्यमंत्री अजित पवारांनी शहरातील समस्यांवर भाष्य केलं आहे. त्यांनी सत्ताधाऱ्यांवर निशाणा साधत शहरातील भ्रष्टाचाऱ्यांचा ‘आका’ संपवायचा असल्याचे नागरिकांना आश्वासन दिले आहे. 

अजित पवार म्हणाले, ग्रीन बॉण्ड नावाखाली २०० कोटींचे कर्जरोखे काढले आहेत. यांनी लोकांची घरेदारे पाडली. त्यांना रस्त्यावर आणले. यांच्या हातात सत्ता गेली तर परत शहराचा हे खेळखंडोबा करतील. अनधिकृत घरांमध्ये राहणारे नागरिक आपलेच आहेत. प्रॉपर्टी कार्ड देण्याचे आज एका मंत्र्याने याच ठिकाणी सांगितले. मात्र, मी जिल्ह्याचा पालकमंत्री आहे. त्यामुळे तुमच्या प्रॉपर्टी कार्डचा विषय मीच मार्गी लावू शकतो. आपल्याला भ्रष्टाचारासोबत त्यांच्या ‘आका’लाही संपवायचे आहे.

२०१७ पर्यंत आम्ही सर्व कारभार पाहत असताना ज्या मूलभूत सुविधा पुरवण्यात आल्या; त्या सर्व सुविधा आम्ही तुम्हाला पुन्हा उपलब्ध करून देऊ. मुबलक पाणीपुरवठा, चांगले रस्ते, स्वच्छ परिसर यांसारख्या सर्व सुविधा पुन्हा तुमच्या दारापाशी आणू.  त्याकरता येत्या १५ जानेवारीला आमच्या सर्व उमेदवारांना मतांच्या रूपानं तुम्ही आशीर्वाद द्या असं आवाहन अजित पवारांनी यावेळी केलं आहे, 

मागचे जे झाले गेले ते गंगेला मिळाले

महापालिकेतील सत्ताधारी कोणाला ठेकेदारीचे काम द्यायचे ते ठरवतात. नाही ऐकले तर काम देत नाहीत. कारभारी बदलले पाहिजेत. त्यांना सत्तेची गुर्मी आली आहे. पैशाचा माज आला आहे. त्यांचा माज जिरवल्याशिवाय मी शांत बसणार नाही. आम्ही तुतारी आणि घड्याळ एकत्र आलो आहोत. मागचे जे झाले गेले ते गंगेला मिळाले, त्यामुळे आता एकत्रित काम करुया असेही पवार यांनी यावेळी सांगितले आहे.