महायुतीने चार प्रभाग निवडणुकीआधीच गमावले; बंडखोरीची केली चिंता, पण बसला मोठा फटका

२२७ प्रभागांपैकी महायुती २२३ जागांवर महायुतीचे उमेदवार रिंगणात असणार आहेत. 

सुजित महामुलकर, लोकमत न्यूज नेटवर्क, मुंबई : अर्ज भरण्याच्या शेवटच्या क्षणापर्यंत भाजप-शिंदेसेनेच्या महायुतीने बंडखोरांना अर्ज भरण्याची संधी मिळू नये, यासाठी प्रचंड गुप्तता पाळली. मात्र, त्याचा फटका महायुतीलाच बसला असून चार प्रभागांत उमेदवार नसल्याने महायुतीने हे प्रभाग गमावल्याच्या जमा आहेत. यामुळे २२७ प्रभागांपैकी महायुती २२३ जागांवर महायुतीचे उमेदवार रिंगणात असणार आहेत. 

एकीकडे राज्यात अनेक शहरात महायुतीचे उमेदवार बिनविरोध निवडून आल्याचे चित्र आहे. दक्षिण मुंबईतील प्रभाग २११ आणि २१२ तसेच ट्रॉम्बे-चिता कॅम्पमधील प्रभाग १४५ आणि कुर्ला पश्चिमेकडील प्रभाग क्रमांक १६७ मध्ये महायुतीचे उमेदवार रिंगणात नसणार आहेत. त्यामुळे विरोधी पक्ष आपसात भिडणार असल्याचे स्पष्ट झाले आहे. 

सर्वसाधारणपणे अधिकृत उमेदवारासोबत एक डमी उमेदवार अर्ज दाखल करण्याची प्रथा यापूर्वी होती. याचे कारण अधिकृत उमेदवाराचा अर्ज काही कारणास्तव बाद झाला तर डमी उमेदवाराचा अर्ज अधिकृत होऊन तो निवडणूक लढवतो. यावेळी जागावाटपातील गोंधळ आणि गुप्तता ठेवल्याने डमी उमेदवाराचा अर्ज भरला गेला नाही, असे सूत्रांनी सांगितले. 

महायुतीच्या अनुपस्थितीत होणारी लढत

प्रभाग १४५ : राष्ट्रवादी (अजित पवार), काँग्रेस आणि उद्धवसेना
प्रभाग १६७ : काँग्रेस, उद्धवसेना आणि समाजवादी पक्ष
प्रभाग २११ : राष्ट्रवादी (अजित पवार), काँग्रेस, समाजवादी पक्ष
प्रभाग २१२ : काँग्रेस, मनसे आणि अखिल भारतीय सेना