Kolhapur Municipal Election Results 2026: काटाजोड लढतीत अजित पवार गटाच्या शहराध्यक्षाने मारली बाजी, काँग्रेसच्या उमेदवाराचा पराभव

यापूर्वी हे दोन्ही उमेदवार कधी आमने सामने आले नव्हते

कोल्हापूर : कोल्हापूर शहराचा आत्मा असलेल्या प्रभाग क्रमांक १२ मध्ये गेल्या दहा वर्षांत केलेली विकासकामे, आणि त्याहीपेक्षा प्रत्येक कुटुंबाशी असलेला वैयक्तिक संपर्क, त्यांच्या अडीअडचणीला मदत आणि राजकीय कौटुंबिक पार्श्वभूमी यामुळे आदिल फरास यांच्या गळ्यात २ हजार ३६४ मतांनी विजयाची माळ पडली. 

शहराच्या मध्यवर्ती परिसरात असलेल्या अंबाबाई मंदिराभोवतीचा हा विस्तीर्ण प्रभाग. महायुतीच्या वाटाघाटीत ही जागा राष्ट्रवादी अजित पवार पक्षाला गेली. लक्षवेधी लढतींमध्ये प्रभाग १२ मधील राष्ट्रवादी काँग्रेसअजित पवार पक्षाचे आदिल फरास आणि काँग्रेसचे ईश्वर परमार यांच्यामध्ये काटाजोड लढत होती. यापूर्वी हे दोन्ही उमेदवार कधी आमने सामने आले नव्हते. ते वेगवेगळ्या प्रभागातून लढायचे. 

आता मात्र आदिल फरास यांची कौटुंबिक राजकीय पार्श्वभूमी, भागातील काम आणि जनसंपर्क या जमेच्या बाजू होत्या तर ईश्वर परमार यांनाही सभागृहाचा दांडगा अनुभव होता. दोन्ही मातब्बर उमेदवार असल्याने सगळ्यांचे लक्ष लढतीकडे होते.