'कॉमेडी करणे आव्हानात्मक'

आपल्या विनोदी शैलीने अभिनेता भाऊ कदमने प्रेक्षकांना खळखळून हसविले आहे. आता प्रेक्षकांचा हा लाडका अभिनेता ‘झाला बोभाटा’ या चित्रपटात झळकतोय. त्याच्या या चित्रपटाविषयी लोकमत सीएनएक्सने साधलेला हा मनमोकळा संवाद...

या चित्रपटातील तुझी भूमिका काय आहे?
या चित्रपटात मी दिनू नावाची भूमिका साकारत आहे. गावाच्या प्रश्नांशी त्याचे काही देणं-घेणं नसते. त्याला फक्त त्याच्या लग्नाची घाई असते. तो प्रत्येक महिलेला विचारत असतो, की लग्न झालं का? तसेच तो एका मुलीच्या प्रेमातही पडतो. मात्र, ती मुलगी लग्न करण्यास नकार देते. मग त्यासाठी तो काय वेडेपणा करतो, यासाठी प्रेक्षकांना हा चित्रपट पाहावा लागेल.
या चित्रपटाच्या अनुभवाविषयी काय सांगशील?
या चित्रपटाचा अनुभव खूपच छान होता. दिलीप प्रभावळकर, संजय खापरे आणि कमलेश सावंत यांच्यासोबत काम करताना खूप मजा आली आहे. त्याचप्रमाणे खूप शिकायलादेखील मिळाले. तसेच या चित्रपटातील काही कलाकारांबरोबरच नाटकातदेखील काम केले आहे. त्यामुळे आमचं टीम वर्क खूपच छान जमून आले.
तू सध्या एक टीव्ही शो करत आहेस. छोटा पडदा आणि रूपेरी पडद्याविषयी तुला काय फरक जाणवतो?
चित्रपटातून एकच भूमिका साकारण्यास मिळते. मात्र मी ज्या शोमध्ये काम करत आहे. तिथे सातत्याने मला वेगवेगळ््या भूमिका करण्यास मिळतात. तसेच फार कमी वेळात येथे खूप धमाल करता येते. मात्र चित्रपटात वेगळ््या पद्धतीचे काम करण्यास मिळते. हे काम कमी वेळात दाखवू शकत नाही. येथे फर्स्ट, मध्यान्ह आणि शेवट असतो. अशा पद्धतीने छोट्या आणि रूपेरी पडद्याचा अनुभव खूपच वेगळा आणि मजेशीर असतो.
कॉमेडी करणे आव्हानात्मक असते?
हो नक्कीच. गंभीर भूमिका आपण सहज करू शकतो. मात्र कॉमेडीचे टायमिंग आणि त्या पद्धतीचा नेमकेपणा यायला पाहिजे. तसेच ते मांडतादेखील आले पाहिजे. त्या वेळी ते टायमिंग आणि रिअ‍ॅक्शन आली नाही तर तो प्रसंग फारच अवघड होऊन बसतो. त्यामुळे कॉमेडी करणे खरंच खूप आव्हानात्मक असते.
भाऊ प्रेक्षकांना नेहमी कॉमेडी भूमिकेत पाहायला मिळतो, आता वेगळ्या भूमिकेत कधी पाहायला मिळणार?
आता मुळातच माझी सुरुवातच कॉमेडीने झाली आहे. प्रेक्षकांना मला कॉमेडीमध्ये पाहायला आवडते. भाऊ आले म्हणजे विनोद पाहिजे हे गणितच तयार झाले आहे. म्हणून मी कॉमेडी भूमिका साकारतो. कारण शेवटी कलाकार हे प्रेक्षकांसाठीच काम करत असतात. मात्र वेगळ््या भूमिका करण्याच्या संधी मिळाली तर नक्कीच मी करेन.