कोरोना व्हायरसच्या संकटात क्रीडा स्पर्धा रद्द झाल्या असताना टीम इंडियाला मोठा धक्का बसला आहे. ऑस्ट्रेलियन क्रिकेट संघाकडून टीम इंडियाला हा धक्का बसला आहे. भारतीय संघाला आंतरराष्ट्रीय क्रिकेट परिषदेच्या ( आयसीसी) कसोटी क्रमवारीतील अव्वल स्थान गमवावे लागले आहे.
2016नंतर भारताला कसोटीतील अव्वल स्थान गमवावे लागले आहे. ऑस्ट्रेलियन संघानं हे अव्वल स्थान पटकावले आहे. आयसीसीनं शुक्रवारी कसोटी, ट्वेंटी-20 आणि वन डे क्रिकेटमधील संघांची क्रमवारी जाहीर केली. क्रिकेट स्पर्धा होत नसतानाही टीम इंडियानं अव्वल स्थान कसं गमावलं? जाणून घेऊया...
भारतीय संघानं ऑक्टोबर 2016मध्ये कसोटी क्रिकेटमध्ये अव्वल स्थान पटकावले होते. 2016मध्ये टीम इंडियानं 12 कसोटी सामने जिंकले होते, तर एक पराभव पत्करला होता.
विराट कोहलीच्या नेतृत्वाखाली टीम इंडियनां पाच कसोटी मालिका जिंकल्या होत्या. त्यात ऑस्ट्रेलिया आणि इंग्लंड यांच्याविरुद्धच्या मालिकेचाही समावेश होता. त्यामुळे तेव्हा टीम इंडिया कसोटी क्रमवारीत अव्वल स्थानावर विराजमान झाली होती.
आयसीसीनं ही क्रमवारी जाहीर करताना 2016-17च्या मोसमातील आकडेवारी ग्राह्य धरलेली नाही. आसीसीनं 2017च्या मोसमातील आकडेवारीवर ही क्रमवारी निश्चित केली आहे.
2019नंतर खेळलेल्या सामन्यांतून 100 टक्के आणि त्यापूर्वीच्या दोन वर्षांतील कामगिरीच्या 50 टक्के गुणांची बेरीज करून ही क्रमवारी ठरवण्यात आली. त्यामुळे टीम इंडियाला अव्वल स्थान गमवावे लागले.
ऑस्ट्रेलियाच्या खात्यात 116 गुण जमा झाले असून न्यूझीलंड ( 115) आणि भारत ( 114) अनुक्रमे दुसऱ्या व तिसऱ्या स्थानावर आहे.
2017मध्ये भारतानं 11 पैकी 7 कसोटी सामने जिंकले, एकात पराभव झाला आणि तीन सामने अनिर्णित राहीले.
2018मध्ये भारताला 14 पैकी 7 सामने जिंकता आले आणि 2019मध्ये आठपैकी सात सामने जिंकले. लॉकडाऊनपूर्वी टीम इंडियानं न्यूझीलंड दौऱ्यावर दोन कसोटी सामने खेळले आणि त्यात 0-2 असा पराभव पत्करावा लागला.
ट्वेंटी-20 क्रमवारीत पाकिस्तानने अव्वल स्थान गमावले