Gautam Gambhir Abhishek Sharma Viral Video: दक्षिण आफ्रिकेविरुद्धच्या सुपर ८ सामन्यात भारतीय संघाचा ७६ धावांनी पराभव झाला. या पराभवानंतर भारतीय संघ झिम्बाब्वेविरुद्धच्या 'करो वा मरो' सामन्यासाठी चेन्नईत दाखल झाला. त्यातच विमानतळावरून हॉटेलकडे जाणाऱ्या टीम बसमध्ये प्रशिक्षक गौतम गंभीर आणि फॉर्मात नसलेला अभिषेक शर्मा यांच्यात झालेल्या चर्चेचा व्हिडीओ व्हायरल झाला आहे.
'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा
नेमकं काय घडलं?
व्हायरल व्हिडिओमध्ये गौतम गंभीर बसमध्ये ड्रायव्हरच्या मागील सीटवर अभिषेक शर्मासोबत बसलेला दिसला. गंभीर अत्यंत सिरियस चेहऱ्याने हातवारे करत अभिषेकला काहीतरी समजावून सांगताना किंवा झापताना दिसला. त्याच्या देहबोलीवरून तो अभिषेकच्या खराब कामगिरीवर नाराज असल्याचे स्पष्ट जाणवत होते. अभिषेक शर्मा सध्या मैदानात अत्यंत वाईट टप्प्यातून जात आहे. या विश्वचषकातील त्याच्या मागील चार डावांची धावसंख्या ०, ०, ० आणि १५ अशी आहे. दक्षिण आफ्रिकेविरुद्ध त्याने चांगली सुरुवात केली होती, पण तो मोठी खेळी करण्यात अपयशी ठरला. हा व्हिडिओ समोर आल्यानंतर सोशल मीडियावर चर्चा सुरू झाली की, गंभीर अभिषेक शर्माला झापतो आहे.
काहींनी याला गंभीरची 'बसमधील कोचिंग स्टाईल' म्हटले आहे. तर काहींनी त्याच्यावर टीका केली की, अशा चर्चा खाजगीत व्हायला हव्यात. एका युजरने म्हटले की, गंभीर सरांनी खेळाडूचा आत्मविश्वास वाढवण्यासाठी रोहित शर्माकडून काही गोष्टी शिकायला हव्यात.
झिम्बाब्वेविरुद्धचा सामना महत्त्वाचा; बदलांची शक्यता
भारताचा नेट रन रेट (-३.८००) सध्या खूप खालावला आहे. उपांत्य फेरीच्या शर्यतीत टिकून राहण्यासाठी भारताला २६ फेब्रुवारीला चेपॉक स्टेडियमवर झिम्बाब्वेविरुद्ध मोठा विजय मिळवणे अनिवार्य आहे. अभिषेक शर्माच्या सततच्या अपयशामुळे आता संघात त्याच्या जागी संजू सॅमसनला संधी देण्याची मागणी जोर धरत आहे. गंभीर आणि अभिषेक यांच्यातील या गंभीर चर्चेनंतर, अभिषेकला अखेरची संधी मिळते की तो संघातून बाहेर पडतो, हे पाहणे औत्सुक्याचे ठरेल.
