Manu Bhaker on Vaibhav Suryavanshi, IPL 2026: दोन वेळा ऑलिम्पिक पदके विजेती नेमबाज मनू भाकर हिने नुकतेच भारतीय राष्ट्रीय नेमबाजी संघटनेच्या (NRAI) ७५ व्या वर्धापनदिन सोहळ्याला हजेरी लावली. या कार्यक्रमादरम्यान मनू भाकर हिने प्रसारमाध्यमांशी संवाद साधला. पण तिला क्रिकेटपटू वैभव सूर्यवंशीबद्दलही प्रश्न विचारण्यात आले. वैभव सूर्यवंशी सध्या क्रीडाविश्वात चर्चेत आहे, पण या दोघांचा क्रीडाप्रकार पूर्णपणे वेगळा आहे. त्यामुळेच सोशल मीडियावर यावरून एक वाद सुरू झाला असून, अनेकांच्या मते हा मनू भाकर हिच्या कामगिरीवर झालेला हा अन्याय आहे.
वैभव सूर्यवंशीबद्दल काय म्हणाली मनू भाकर?
या कार्यक्रमात शूटिंग लीग ऑफ इंडिया कार्यक्रम आणि लॉस एंजेलिस २०२८ ऑलिम्पिकशी संबंधित एका खेळाडू ॲपचे अनावरण यांसारख्या विषयांवर चर्चा सुरू होती. कार्यक्रमादरम्यान, पत्रकारांनी मनू भाकर हिला युवा क्रिकेटपटू वैभव सूर्यवंशीबद्दल त्यांचे मत विचारले. या प्रश्नाला उत्तर देताना मनू भाकर म्हणाल्या, "जर वैभव सूर्यवंशीला योग्य मार्गदर्शन, त्याच्या सभोवतालचे सकारात्मक वातावरण आणि योग्य व्यक्तीचे मार्गदर्शन मिळाले, तर वय हा केवळ एक आकडा आहे. माझा विश्वास आहे की तो भारतीय क्रिकेटचा पुढचा मोठा स्टार बनू शकतो."
पण मनू भाकरसा असे प्रश्न विचारल्याबद्दल सोशल मीडियावर पत्रकारांवर जोरदार टीका झाली. नेमबाजीच्या स्पर्धेदरम्यान ऑलिम्पिक पदक विजेत्या नेमबाजाला क्रिकेटपटूबद्दल विचारणे अनुचित असल्याचे चाहत्यांनी म्हटले. अनेकांनी लिहिले की, भारतात क्रिकेट इतके प्रचलित आहे की इतर खेळांतील खेळाडूंना अनेकदा कमी लेखले जाते.
याच मुद्द्यावर कोलकाता नाईट रायडर्सचे (केकेआर) माजी संघ संचालक जॉय भट्टाचार्य यांनीही तीव्र प्रतिक्रिया दिली. जॉय भट्टाचार्य यांनी 'एक्स' या सोशल मीडिया प्लॅटफॉर्मवर लिहिले, "मित्रांनो, ती एक ऑलिम्पिक पदक विजेती आहे. वैभव सूर्यवंशीबद्दल तिला काय वाटते, असे विचारणे तिच्या कामगिरीचा आणि तिच्या खेळाचा अपमान करण्यासारखे आहे. क्रिकेट हा तसाही या देशाचा सर्वात मोठा छंद आहे; तुमच्या क्रीडा संपादकांना सूर्यवंशीबद्दल मथळा तयार करण्यासाठी इतर कोणत्याही सेलिब्रिटीच्या वक्तव्याची गरज नाही. किंवा, पुढच्या वेळी, वैभव सूर्यवंशीला मनू भाकरबद्दल विचारून बघा आणि त्याच्या चेहऱ्यावरचे भाव पाहा."
आणखी काही युजर्सनेही त्यांच्या मताला दुजोरा दिला आहे.
