Hardik Pandya Hit Longest Six In ICC T20 World Cup Against Namibia : टी-२० वर्ल्ड कप स्पर्धेतील नामिबियाविरुद्धच्या सामन्यात हार्दिक पांड्याने अष्टपैलू कामगिरी करुन दाखवली. फलंदाजीवेळी फक्त २८ चेंडूत ५२ धावांची धमाकेदार खेळी केल्यावर त्याने गोलंदाजीत २ विकेट्स घेत संघाच्या विजयात मोलाचा वाटा उचलला. या सामन्यात हार्दिक पांड्याच्या बॅटमधून ४ चौकार आणि ४ षटकार पाहायला मिळाले. यात त्याने यंदाच्या हंगामातील सर्वात लांब षटकार मारला.
'लोकमत'चं WhatsApp चॅनल फॉलो करा!
हार्दिक पांड्याच्या बॅटमधून निघाला स्पर्धेतील सर्वात लांब षटकार
हार्दिक पांड्या भारताच्या डावातील १५व्या षटकात फलंदाजीला आला. बर्नार्ड शोल्ट्झ यांच्या गोलंदाजीवर त्याने १०९ मीटर लांबीचा गगनचुंबी षटकार लगावला. १५व्या षटकातील तिसऱ्या चेंडूवर लान्ग ऑफच्या दिशेने मारलेला हा षटकार स्पर्धेतील आतापर्यंतचा सर्वात लांब षटकार ठरला. त्याने मारलेल्या षटकाराचा व्हिडिओ सोशल मीडियावर तुफान व्हायरल होत आहे. याच षटकाच्या पहिल्या चेंडूवर शिवम दुबेने मारलेला षटकार १०७ मीटर लांब अंतरावर पडला होता. पण काही वेळातच हार्दिकने १०९ मीटर अंतर लांब षटकार मारत त्याला मागे टाकले. दुबेने डीप मिडविकेटच्या दिशेने षटकार ठोकला होता.
T20 World Cup 2026 : टीम इंडियाचा जलद 'सेंच्युरी'चा पराक्रम! नामिबिया विरुद्ध 'द्विशतक' झालं, पण...
टी-२० वर्ल्ड कप २०२६ मधील सर्वात लांब षटकार
- १०९ मीटर – हार्दिक पांड्या (भारत)
- १०७ मीटर – शिवम दुबे (भारत)
- १०० मीटर – कमिंदू मेंडिस (श्रीलंका)
- ९८ मीटर – नूर अहमद (अफगाणिस्तान)
- ९८ मीटर – कॅमेरून ग्रीन (ऑस्ट्रेलिया)
ईशान किशनच्या फटकेबाजीनंतर हार्दिक पांड्याचा धमाका
नामिबियाविरुद्धच्या सामन्यात पॉवर प्लेमध्ये ईशान किशनचा जलवा पाहायला मिळाला. त्याने ६१ धावांची धमाकेदार खेळी केली. त्यानंतर लवकर फलंदाजी करण्याची संधी मिळाल्यावर हार्दिक पांड्याने अर्धशतकाने मैफिल लुटली. तो मैदानात असताना भारतीय संघ धावफलकावर २४०-५० धावांचा पल्ला सहज गाठेल, असे वाटत होते. पण नामिबियाचा कर्णधार गेर्हार्ड एरॅस्मसने त्याच्या खेळीला ब्रेक लावला. पण बाद होण्याआधी त्याने आपली भूमिका अगदी चोख बजावली होती.
