India vs South Africa, 2nd Test Live Updates : चेतेश्वर पुजारा व अजिंक्य रहाणे यांच्या अर्धशतकी खेळीनंतर भारताचा डाव पुन्हा गडगडला. शार्दूल ठाकूरनं पलंदाजीत थोडे योगदान दिले अन् भारतानं दुसऱ्या डावात दोनशेपार आघाडी घेतली. पण, या सामन्यात जसप्रीत बुमराह व मार्को जॅन्सेन यांच्यात वादाची ठिणगी पडली. कधीकाळी इंडियन प्रीमिअर लीगमधील मुंबई इंडियन्सकडून हे खेळाडू मैदानावर भिडलेले पाहून अम्पायरनं लगेच धाव घेतली व त्यांचे भांडण सोडवले. जॅन्सेननं टाकलेला बाऊन्सर बुमराहच्या खांद्यावर आदळला आणि त्यानंतर वाद सुरू झाला. पण, यानंतर पुढील षटकात बुमराहनं कागिसो रबाडाला खणखणीत षटकार मारताच विराटसह भारताच्या सर्व खेळाडूंनी उभं राहून टाळ्यांचा कडकडाट केलाय
भारताच्या पहिल्या डावातील २०२ धावांच्या प्रत्युत्तरात आफ्रिकेचा पहिला डाव २२९ धावांवर गडगडला. शार्दूल ठाकूर यानं मंगळवारी इतिहास घडवला. जोहान्सबर्ग कसोटी त्यानं एका डावात ७ विकेट्स घेण्याचा पराक्रम केला. आफ्रिकेत एका डावात ७ विकेट्स घेणारा तो पहिला आशियाई जलदगती गोलंदाज ठरला. १०० वर्षांच्या इतिहासात आफ्रिकेत दोनच जलदगती गोलंदाजांना डावात ७ विकेट्स घेता आल्या आहेत. शार्दूलनं ६१ धावांत ७ विकेट्स घेतल्या. भारताच्या दुसऱ्या डावात लोकेश ( ८ ) व मयांक ( २३ ) यांना अनुक्रमे मार्को जॅन्सेन व ऑलिव्हर यांनी बाद केले. २ बाद ४४ धावांवरून अजिंक्य व पुजारा यांनी डाव सावरण्यास सुरूवात केली आणि दिवसअखेर भारताला २ बाद ८५ धावांपर्यंत मजल मारली होती.
तिसऱ्या दिवसाच्या पहिल्या सत्रात पुजारा-रहाणे यांनी आक्रमक खेळ केला. पुजारानं ८६ चेंडूंत ५३ आणि रहाणेनं ७८ चेंडूंत ५८ धावांची खेळी केली. तिसऱ्या दिवसाच्या लंच ब्रेकपर्यंत भारतानं ६ बाद १८८ धावा करताना १६१ धावांची आघाडी घेतली आहे. रिषभ पंत चुकीचा फटका मारून शून्यावर बाद झाला. त्यानंतर आर अश्विन व शार्दूल ठाकूर यांनी फलंदाजीत योगदान देताना अनुक्रमे १६ व २८ धावा केल्या. शार्दूलचे फटके पाहून विराट कोहली ड्रेसिंगरुममध्ये टाळ्या वाजवताना दिसला. मोहम्मद शमी भोपळ्यावर माघारी परतला. भारताच्या ८ बाद २४५ धावा झाल्या आहेत.