India vs South Africa, 2nd Test Live Updates : भारत-दक्षिण आफ्रिका यांच्यातल्या दुसऱ्या कसोटीच्या चौथ्या दिवसाचा बराचसा खेळ पावसामुळे वाया गेला. भारतानं विजयासाठी ठेवलेल्या २४० धावांच्या लक्ष्याचा पाठलाग करताना आफ्रिकेनं तिसऱ्या दिवसअखेर २ बाद ११८ धावा केल्या होत्या. डीन एल्गर व रॅसी व्हॅन डेर ड्युसेनं हे खेळपट्टीवर ठाण मांडून होते. चौथ्या दिवशी भारत ८ विकेट्स घेऊन इतिहास रचणार की आफ्रिका १२२ धावा करून मालिका बरोबरीत आणणार याची सर्वांना उत्सुकता होती, परंतु पावसानं खेळ खंडोबा केला. पाच तासानंतर अखेर पावसानं विश्रांती घेतली आणि भारतीय खेळाडू मैदानावर वॉर्म अपसाठी उतरले आहेत. भारताच्या पहिल्या डावातील २०२ धावांच्या प्रत्युत्तरात आफ्रिकेचा पहिला डाव २२९ धावांवर गडगडला. शार्दूल ठाकूरनं ६१ धावांत ७ विकेट्स घेतल्या. भारताच्या दुसऱ्या डावात लोकेश ( ८ ) व मयांक ( २३ ) यांना अनुक्रमे मार्को जॅन्सेन व ऑलिव्हर यांनी बाद केले. चेतेश्वर पुजारानं ८६ चेंडूंत ५३ आणि अजिंक्य रहाणेनं ७८ चेंडूंत ५८ धावांची खेळी केली. रिषभ पंत चुकीचा फटका मारून शून्यावर बाद झाला. आर अश्विन व शार्दूल ठाकूर यांनी फलंदाजीत योगदान देताना अनुक्रमे १६ व २८ धावा केल्या. हनुमा विहारी एका बाजूनं विकेट टिकवून खेळला, परंतु भारताचा दुसरा डाव २६६ धावांवर आटोपला. हनुमा विहारी ४० धावांवर नाबाद राहिला. प्रत्युत्तरात डीन एल्गर व एडन मार्कराम यांनी आफ्रिकेला चांगली सुरुवात करून दिली. पण, पुन्हा एकदा शार्दूल ठाकूरनं भागीदारी तोडली. त्यानं मार्करामला ( ३१) पायचीत पकडले अन् आफ्रिकेला ४७ धावांवर पहिला धक्का दिला. एल्गर व किगन पीटरसन यांनी टीम इंडियाची डोकेदुखी वाढवली होती. या जोडीनं दुसऱ्या विकेटसाठी ४६ धावा जोडल्या अन् आर अश्विननं आफ्रिकेला दुसरा धक्का दिला. पीटरसन ४४ चेंडूंत २८ धावा करून पायचीत झाला. रिषभ पंत यष्टिंमागून स्लेजिंग करत होता, परंतु एल्गरची एकाग्रता तो भंग करू शकला नाही. बोटावर, हेल्मेटवर चेंडू आदळूनही एल्गर मजबूतीनं उभा राहिला. एल्गर व रॅसी व्हॅन डेर ड्युसेन यांनी दिवसअखेर खिंड लढवताना आफ्रिकेला २ बाद ११८ धावांपर्यंत मजल मारून दिली होती. आफ्रिकेला विजयासाठी १२२ धावा करायच्या आहेत, तर भारताला ८ विकेट्स टिपायच्या आहेत.
हाती आलेल्या बातमीनुसार चौथ्या दिवसाचा खेळ ७.१५ वाजता सुरू होणार असून आजच्या दिवशी ३४ षटकं फेकली जाणार आहेत.