Home Loan Credit Score News: आजच्या काळात स्वतःचं घर खरेदी करण्यासाठी अनेक लोक बँकेकडून होम लोन घेत आहेत. अशा परिस्थितीत, जर तुम्हीही होम लोन घेण्याचा प्लॅन करत असाल, तर सर्वात आधी तुम्ही एका गोष्टीकडे नक्कीच लक्ष दिलं पाहिजे, ती म्हणजे तुमचा 'क्रेडिट स्कोर'. भारतात बँका आणि वित्तीय संस्था कोणत्याही व्यक्तीला कर्ज देण्यापूर्वी त्याची परतफेड करण्याची क्षमता समजून घेण्यासाठी क्रेडिट स्कोर पाहतात. चांगला क्रेडिट स्कोर केवळ कर्ज मिळण्याची शक्यताच वाढवत नाही, तर तुम्हाला चांगला व्याजदर आणि चांगल्या अटींवर कर्ज मिळवून देण्यासही मदत करू शकतो.
क्रेडिट स्कोर म्हणजे काय?
क्रेडिट स्कोर ही एक संख्या असते, जी साधारणपणे ३०० ते ९०० च्या दरम्यान असते. तुम्ही तुमच्या जुन्या कर्जाची परतफेड किती जबाबदारीनं केली आहे, हे यावरून समजतं. तुमचा स्कोर जितका जास्त असेल, तितकेच तुम्ही कर्ज देणाऱ्या संस्थांच्या नजरेत विश्वासार्ह मानले जाता. भारतात याला अनेकदा 'सिबिल स्कोर' (CIBIL Score) असंही म्हटलं जातं. हा स्कोर TransUnion CIBIL, Experian, Equifax आणि CRIF Highmark सारख्या वेगवेगळ्या संस्था तयार करतात.
सरकारी बँक कर्मचाऱ्यांसाठी आनंदाची बातमी! लवकरच पगारवाढ होणार, अर्थ मंत्रालयानं जारी केले निर्देश
होम लोनसाठी किती स्कोर आवश्यक?
जर तुम्हाला होम लोन घ्यायचं असेल, तर सामान्यतः ७०० किंवा त्यापेक्षा जास्त क्रेडिट स्कोर असणं किमान आवश्यक मानलं जातं. मात्र, जर तुमचा स्कोर ७५० किंवा त्यापेक्षा जास्त असेल, तर तुम्हाला बँकांकडून सर्वोत्तम ऑफर्स मिळण्याची शक्यता असते. येथे महत्त्वाची बाब म्हणजे बँका केवळ क्रेडिट स्कोरच पाहत नाहीत, तर तुमचं उत्पन्न, मालमत्ता आणि ज्या प्रॉपर्टीसाठी कर्ज घेतलं जात आहे तिचं मूल्य देखील विचारात घेतात. या सर्व गोष्टींच्या आधारेच बँका कर्ज देतात.
कर्ज घेण्यापूर्वी या गोष्टी लक्षात ठेवा
होम लोन घेण्यापूर्वी क्रेडिट स्कोरसोबतच तुमचं उत्पन्न स्थिर असणं आवश्यक आहे, जेणेकरून तुम्ही कर्जाचे हप्ते सहजपणे भरू शकाल. याशिवाय, केवळ कमी व्याजदर पाहून निर्णय घेऊ नका, तर प्रोसेसिंग फी, छुपं शुल्क, विम्याचा खर्च आणि उशिरा पेमेंट केल्यावर लागणारा दंड यांसारख्या गोष्टीही समजून घ्या. या सर्व बाबींचा विचार करूनच एखाद्या बँकेतून कर्ज घेण्याचा निर्णय घ्यावा.
कर्जाचा कालावधी आणि EMI
होम लोनचा कालावधी ही देखील एक महत्त्वाची बाब आहे. कर्जाचा कालावधी जितका जास्त असेल तितका EMI कमी होतो, परंतु तुम्हाला एकूण व्याज जास्त भरावं लागतं. दुसरीकडे, कमी कालावधीसाठी EMI जास्त असतो, पण एकूण व्याज कमी लागतं. त्यामुळे तुमच्या सोयीनुसार योग्य पर्यायाची निवड करा.