Video: भिवंडीत भाजप आमदार व माजी महापौर गटात जोरदार हाणामारी; परिसरात तणाव

भाजपा आमदार आणि भाजपाचेच माजी महापौर यांच्यातील वाद रविवारी विकोपाला गेला. माजी महापौर असलेल्या नेत्याने आमदाराच्या कार्यालयात घुसून कार्यकर्त्यांना मारहाण केली.

भिवंडी : भाजपाचे आमदार महेश चौघुले व माजी महापौर विलास पाटील यांच्या गटात जोरदार हाणामारी झाली. ही घटना रविवारी रात्री ९ वाजेच्या सुमारास घडली आहे. विलास पाटील समर्थकांनी आमदार महेश चौघुले यांच्या छत्रपती शिवाजी महाराज चौकातील कार्यालयात घुसून कार्यकर्त्यांना बेदम मारहाण केली आहे. 

पोलिसांनी वेळीच धाव घेत परिस्थिती नियंत्रणात आणली आहे, मात्र परीसरात मोठा तणाव निर्माण झाला आहे.

दोन्ही नेत्यांमध्ये वाद काय?

महापालिका निवडणुकीत प्रभाग एकमध्ये भाजपा आमदार महेश चौघुले यांचा मुलगा मित चौघुले हा आणि माजी महापौर विलास पाटील यांचा मुलगा मयुरेश पाटील यांच्या विरोधात निवडणूक रिंगणात होते.

भाजप आमदार महेश चौघुले व माजी महापौर विलास पाटील यांच्या गटात जोरदार हाणामारी झाल्याची घटना राविवारी रात्री ९ वाजेच्या सुमारास भिवंडीमध्ये घडली.#Maharashtra#CrimeNews#viralvideopic.twitter.com/YuHtNfQSJ7

— Lokmat (@lokmat) January 18, 2026

पाटील यांनी चौघुले यांचा पराभव केला आहे. मात्र उमेदवारी अर्ज भरल्यापासूनच या दोन्ही गटात हाणामारी झाल्याचे घटना घडल्या होत्या.

असे काय घडले की वाद वाढला?

रविवारी सायंकाळी उशीरा विलास पाटील आपल्या मतदारांचे आभार मानत असतानाच भाजपा आमदार समर्थकांनी विलास पाटील यांच्या घरावर हल्ला केला. 

या हल्ल्याची माहिती विलास पाटील यांना समजताच विलास पाटील व त्यांच्या समर्थकांनी आमदार महेश चौघुले यांच्या छत्रपती शिवाजी महाराज चौकातील कार्यालयात घुसून आमदार चौघुले समर्थकांना बेदम मारहाण केली. या घटनेमुळे परिसरात मोठा पोलीस बंदोबस्त ठेवण्यात आला असून परिसरात तणाव निर्माण झाला आहे.

सुरुवातीला आमदार महेश चौघुले यांच्या समर्थकांनी विलास पाटील यांच्या घरावर हल्ला केला. त्याचा व्हिडीओ देखील व्हायरल झाला असून, ज्यात महेश चौघुले यांचा मुलगा मित चौघुले विलास पाटील यांच्या घरावर भाजप कार्यकर्त्यांना सोबत घेऊन  हल्ला करायला गेला असल्याचे स्पष्ट दिसते. या प्रकरणी निजामपुरा पोलीस ठाण्यात गुन्हा दाखल करण्याची प्रक्रिया सुरु आहे.