Thane Municipal Corporation: ठाणे शिंदेसेनेचेच... भाजप लहान भाऊ अन् उद्धवसेना भुईसपाट

युती असल्याने भाजपला यावेळी महापालिकेतील सत्तेत सहभागी होता येईल. 

ठाणे : ठाणे महापालिकेच्या निकालात शिंदेसेनेचीच सरशी झाली असून, सहा जागांवर अगोदरच बिनविरोध नगरसेवक निवडून आलेल्या शिंदेसेनेची घोडदौड बहुमताच्या सत्तेकडे सुरू आहे. ४० जागांवर उमेदवार उभे केलेल्या भाजपला मागील वेळी गाठले तेवढे संख्याबळ गाठता येणार की नाही, याचीच उत्कंठा आहे. अर्थात शिंदेसेना व भाजपची निवडणूकपूर्व युती असल्याने भाजपला यावेळी महापालिकेतील सत्तेत सहभागी होता येईल. 

उद्धवसेनेची मोठी वाताहत झाली आहे. त्यामुळे ठाणे हे ठाकरेंचे नव्हे तर शिंदे यांचेच असल्यावर शिक्कामोर्तब झाले. मनसेला यावेळीही भोपळा फोडता आलेला नाही. मागीलवेळी दुसऱ्या क्रमांकावर असलेल्या राष्ट्रवादी काँग्रेसला विभाजनाचा व परस्पर विरोधी लढाईचा फटका बसला. राष्ट्रवादीच्या पतनाचा लाभ एमआयएमला झाला आहे. कळवा-मुंब्यातील राष्ट्रवादीच्या गडातील एमआयएमचा वाढता प्रभाव आ. जितेंद्र आव्हाड यांची चिंता वाढवणारा आहे.

मोठा भाऊ होण्याचे भाजपचे मनसुबे मिळाले धुळीला ठाणे पालिकेवरील वरचष्मा टिकवून ठेवण्यासाठी शिंदेसेनेने भाजपला जागांच्या वाटाघाटीतच रोखले. त्यामुळे ठाण्यात मोठा भाऊ होण्याचे भाजपचे मनसुबे धुळीला मिळाले. उपमुख्यमंत्री एकनाथ शिंदे यांचे ठाण्यातील निवासस्थान ज्या प्रभागात येते तेथील शिंदेसेनेचा सलग सहावेळा विजयी होणारा उमेदवार उद्धवसेनेने पाडला. हीच काय ती उद्धवसेनेकरिता समाधानाची बाब.

भाजप २८ 
शिंदेसेना ७५ 
काँग्रेस 0 
राष्ट्रवादी अजित पवार ९ 
राष्ट्रवादी शरद पवार १२ 
उद्धवसेना १ मनसे 0 
वंचित 0 
एमआयएम ५
इतर १