'वाड्यावर' या, 'पाटणकरां'नी धाडलं मावळ्यांना आवातनं! भाजप प्रवेश निश्चित, सोपस्कार पूर्ण करण्यासाठी सोमवारी मावळ्यांशी संवाद

शरद पवार राष्ट्रवादी काँग्रेसचे निष्ठावंत पाईक, माजी बांधकाम मंत्री विक्रमसिंह पाटणकर, युवा नेते सत्यजितसिंह पाटणकर आता 'भाजप'च्या वाटेवर आहेत. त्यांचा भाजप प्रवेश गेल्या अनेक दिवसांपासून निश्चित मानला जातोय.

प्रमोद सुकरे 

कराड- शरद पवार राष्ट्रवादी काँग्रेसचे निष्ठावंत पाईक, माजी बांधकाम मंत्री विक्रमसिंह पाटणकर, युवा नेते सत्यजितसिंह पाटणकर आता 'भाजप'च्या वाटेवर आहेत. त्यांचा भाजप प्रवेश गेल्या अनेक दिवसांपासून निश्चित मानला जातोय. पण त्यासाठीचे सोपस्कार पूर्ण करण्यासाठीच सोमवार दि.२६ रोजी त्यांनी आपल्या मावळ्यांना वाड्यावर येण्याचं अवातनं धाडलं आहे. आता या मेळाव्यात ते आपल्या पुढील राजकीय वाटचालीबद्दल नेमकी काय भूमिका मांडतात हे पाहणे महत्वाचे ठरणार आहे.

खरंतर पाटण तालुका हा दुर्गम तालुका म्हणून ओळखला जातो. येथे कोयना धरणामुळे मात्र भूकंपाच्या छोट्या मोठ्या धक्क्यांची सवय येथील जनतेला झाली आहे. पण येथील राजकारण मात्र नेहमीच दोन गटा भोवतीच फिरत राहिले आहे. सध्या मात्र येथे 'राजकीय भूकंपा'च्या हालचाली मोठ्या प्रमाणावर सुरू आहेत. त्याला पाटणकरांच्या वाड्यावर पुढील राजकीय दिशा ठरवण्यासाठी बोलावलेल्या मावळ्यांच्या मेळाव्यावरून पुष्टीच मिळते.

  पाटणकर पाचवेळा आमदार

 विक्रमसिंह पाटणकर यांची राजकीय कारकीर्द १९८३ पासून सुरू झाली. त्यानंतर ५ निवडणुका त्यांनी या मतदारसंघाचे नेतृत्व केले. यादरम्यान त्यांनी एकदा सार्वजनिक बांधकाम मंत्री म्हणून ही काम पाहिले.पण सध्या त्यांच्या हातातून पाटणची सत्ता निसटली आहे. ती परत मिळवण्यासाठी त्यांचे प्रयत्न सुरू आहेत. भाजपमधील प्रवेशाबाबत ची प्रक्रिया हा त्याचाच भाग मानला जातो.

 आता 'जय श्री राम' म्हणणार!

 पाटणकरांनी बोलवलेला हा मेळावा त्यांच्याच वाड्याच्या तटबंदीच्या आत असणाऱ्या श्री राम मंदिरात होणार आहे. या मेळाव्यात बदलती राजकीय परिस्थिती, पाटण तालुक्यातील बदलते राजकारण या सगळ्या बाबतीत ते भूमिका मांडणार असल्याचे निकटवर्ती सांगत आहेत. त्यावेळी पाटणकर ही 'जय श्रीराम' म्हणणार हे निश्चित आहे. 

आधी प्रवेश, मग मेळावा!

पाटणकरांचा भाजपमधील प्रवेश हा निश्चितच आहे. परंतु ते अगोदर काही प्रमुख मावळ्यांच्या उपस्थित मुंबई येथे पक्ष कार्यालयात प्रवेश करतील. त्यानंतर ते पाटण तालुक्यात भाजपमधील ज्येष्ठ नेत्यांच्या उपस्थितीत एक भव्य मेळावा घेऊन शक्ती प्रदर्शन करतील असे भाजपमधील नेत्यांकडून सांगितले जात आहे. 

 नवा अध्याय सुरू होणार!

आजवर दोन गटाभोवतीच फिरत राहिलेल्या पाटणच्या मातीत आता पक्षीय राजकारणाची पाळेमुळे तितकीच रुजू लागली आहेत. पाटण तालुक्यात भाजपला आपली ताकद वाढवायची आहे. त्यामुळे पाटणकर सरकारांना सोबत घेण्याची चाल त्यांनी खेळली आहे. हा प्रवेश झाल्यानंतर पाटण तालुक्यातील राजकारणात नवा अध्याय सुरू होणार हे निश्चित!