Sangli: मिरजेत अजित पवार गटाला मोठा धक्का! उमेदवार आझम काझींसह ८ जण कोल्हापूर-सांगलीतून हद्दपार

Municipal Election: मिरजेच्या राजकारणातून एक मोठी बातमी समोर येत आहे. महापालिका निवडणुकीच्या प्रचाराचा धुरळा उडत असतानाच, राष्ट्रवादी काँग्रेस (अजित पवार गट) चे उमेदवार आझम काझी यांच्यावर पोलीस प्रशासनाने मोठी कारवाई केली आहे.

मिरज: महापालिका निवडणुकीचा प्रचार सुरु असताना मिरजेतील राष्ट्रवादी काँग्रेसअजित पवार गटाचे उमेदवार आझम काझी यांच्यासह आठ जणांना सांगली व कोल्हापूर जिल्ह्यातून एक वर्षासाठी हद्दपार करण्यात आले आहे. उद्या शुक्रवारी उपमुख्यमंत्री अजित पवार यांच्या मिरज दौऱ्याच्या पार्श्वभूमीवर तयारी सुरू असताना पोलिस अधीक्षकांनी ही कारवाई केल्याने राजकीय वर्तुळात खळबळ उडाली आहे. 

मिरजेत प्रभाग क्रमांक सहामधून राष्ट्रवादीच्या माजी नगरसेविका रजिया काझी यांचे पुत्र आझम काझी यांना माजी महापौर मैनुद्दीन बागवान, जरीना बागवान आणि नर्गिस सय्यद यांच्यासह राष्ट्रवादी अजित पवार गटातर्फे उमेदवारी देण्यात आली आहे. सुमारे एक वर्षापूर्वी मिरजेत स्टेशन रोड परिसरात व्यावसायिक वादातून अफगाण हॉटेलवर हल्ला करून तोडफोड केल्याप्रकरणी आझम काझी यांच्यासह असलम काझी, शोएब काझी, मतीन काझी, अक्रम काझी, रमेश कुंजीरे, अल्ताफ रोहिले व मोहसिन गोदड यांच्याविरुद्ध शहर पोलिसात गुन्हा दाखल आहे. 

या गुन्हेगारी कृत्यांच्या पार्श्वभूमीवर आझम काझी व इतर आरोपींविरोधात पोलिस अधीक्षकांकडे हद्दपारीचा प्रस्ताव दाखल करण्यात आला होता. या प्रस्तावानुसार पोलिस अधीक्षक संदीप घुगे यांनी आझम काझी यांच्यासह आठ जणांना सांगली व कोल्हापूर या दोन जिल्ह्यांतून एक वर्षासाठी हद्दपार करण्याचा आदेश दिला आहे. या कारवाईमुळे निवडणूक प्रचारावर व स्थानिक राजकारणावर काय परिणाम होणार, याकडे सर्वांचे लक्ष लागले आहे.