धावपळीच्या जीवनशैलीत केसांची योग्य काळजी घेणं अनेकदा राहून जातं. प्रदूषण, ताणतणाव, अपुरी झोप आणि चुकीचा आहार याचा परिणाम थेट केसांवर दिसू लागतो. केस गळणे, कोरडेपणा, कोंडा किंवा केस निस्तेज दिसणं अशा समस्या वाढतात.(Massage your hair with warm oil - it feels so comfortable, home remedies ) अशावेळी केसांच्या मुळाशी कोमट तेलाने हलक्या हाताने मालीश करणं हा जुना पण प्रभावी उपाय मानला जातो.
कोमट तेलाने मालीश केल्याने टाळूतील रक्ताभिसरण सुधारण्यास मदत होते. त्यामुळे केसांच्या मुळांना पोषण मिळण्यास मदत होऊ शकते. हलक्या हाताने केलेली मालीश अनेकांना आरामदायक वाटते आणि ताण कमी होण्यासही मदत करू शकते. विशेषतः दिवसभराचा थकवा किंवा डोके जड वाटत असेल तर तेलाची मालीश शांत वाटण्यास मदत करते. टाळू कोरडी पडत असेल तर कोमट तेलामुळे त्वचेला ओलावा मिळतो. त्यामुळे खाज किंवा कोरडेपणाचा त्रास काही प्रमाणात कमी होऊ शकतो. अनेकांना नियमित तेल मालीशमुळे केस अधिक मऊ आणि चमकदार दिसू लागल्याचं जाणवतं. मात्र खूप जोरात मालीश करणं टाळावं, कारण त्यामुळे केस तुटण्याची शक्यता वाढू शकते.
कोणतं तेल वापरावं हे केसांच्या प्रकारावर अवलंबून असतं. नारळ तेल हे सर्वात जास्त वापरलं जाणारं तेल आहे. ते हलकं असतं आणि केसांना मऊपणा देण्यासाठी उपयोगी मानलं जातं. बदाम तेलात व्हिटामिन ई असल्यामुळे कोरड्या केसांसाठी अनेक जण ते पसंत करतात. आवळा तेल केसांना पोषण देण्यासाठी आणि केस मजबूत ठेवण्यासाठी वापरलं जातं. तर कोंड्याचा त्रास असेल तर काही लोक टी ट्री ऑइलचे काही थेंब दुसऱ्या तेलात मिसळून वापरतात.
तेल खूप गरम करून वापरू नये. फक्त हलकं कोमट तेल वापरणं योग्य ठरतं. तेल लावल्यानंतर लगेच खूप घट्ट केस बांधू नयेत. तसेच रात्रभर तेल ठेवताना उशी स्वच्छ ठेवणंही महत्त्वाचं आहे. नियमित आणि योग्य पद्धतीने केलेली तेल मालीश ही केसांच्या आरोग्यासाठी फायदेशीर सवय ठरू शकते. मात्र केस गळण्याचा त्रास खूप वाढत असेल किंवा टाळूवर संसर्ग जाणवत असेल तर तज्ज्ञांचा सल्ला घेणं आवश्यक आहे.