नागपूर महापालिका निवडणुकीतून ३०२ उमेदवारांची माघार, बिनविरोध किती?

Nagpur : नागपूर महापालिका निवडणुकीत उमेदवारी अर्ज मागे घेण्याच्या अखेरच्या दिवशी शुक्रवारी भाजप व काँग्रेस बंडखोरांस एकूण ३०२ उमेदवारांनी आपले अर्ज मागे घेतले आहे.

लोकमत न्यूज नेटवर्क
नागपूर : नागपूर महापालिका निवडणुकीत उमेदवारी अर्ज मागे घेण्याच्या अखेरच्या दिवशी शुक्रवारी भाजप व काँग्रेस बंडखोरांस एकूण ३०२ उमेदवारांनी आपले अर्ज मागे घेतले आहे. आता निवडणुकीच्या लढतीचे चित्र स्पष्ट झाले आहे. 

उमेदवारी अर्ज मागे घेण्याच्या पहिल्या दिवशी गुरुवारी केवळ १२ उमेदवारांनी अर्ज मागे घेतले होते. मात्र, आज शेवटच्या दिवशी तब्बल २९० उमेदवारांनी माघार घेतल्याने निवडणूक रिंगणातील चित्र स्पष्ट झाले आहे. उमेदवारी न मिळाल्याने नाराज भाजपच्या अनेक माजी नगरसेवकांनी उमेदवारी दाखल केली होती. यात काही काँग्रेसच्या माजी नगरसेवकांचाही समावेश होता. परंतु भाजपचे काही नाराज अजूनही मैदानात असल्याने लढतीतील रंगत वाढली आहे. नागपुरात अतीतटीची निवड होणार असून कुणीही बिनविरोध निवडून आले नाही. त्यामुळे सर्वच प्रभागात लढती रंगतदार असणार आहेत. 

झोननिहाय आकडेवारी पाहता लकडगंज झोनमध्ये सर्वाधिक ४३ उमेदवारांनी आपले अर्ज मागे घेतले. त्यानंतर मंगळवारी झोनमध्ये ३७, सतरंजीपुरा झोनमध्ये ३५, तर धंतोली आणि नेहरूनगर झोनमध्ये प्रत्येकी ३३ उमेदवारांनी माघार घेतली आहे. गांधीबाग महाल झोनमध्ये ३०, हनुमानगर झोनमध्ये २८, आसीनगर झोनमध्ये २७, धरमपेठ झोनमध्ये २४, तर लक्ष्मीनगर झोनमध्ये १२ उमेदवारांनी उमेदवारी अर्ज मागे घेतले आहेत. या माघारीमुळे अनेक प्रभागांतील उमेदवारांची संख्या लक्षणीयरीत्या कमी झाली आहे.