'अनिल देशमुखांनी काही चुकीचं काम केलं नाही, सीबीआय चौकशीला हजर राहणार'
By ऑनलाइन लोकमत | Published: April 12, 2021 09:44 PM2021-04-12T21:44:17+5:302021-04-12T21:44:50+5:30
मुंबईचे माजी पोलीस आयुक्त परमबीर सिंग यांनी केलेल्या आरोपांवर त्यांची 14 एप्रिलला चौकशी करण्यात येणार आहे.
'अनिल देशमुखांनी काही चुकीचं काम केलं नाही, सीबीआय चौकशीला हजर राहणार'
मुंबई - राज्याचे माजी गृहमंत्री अनिल देशमुख (Anil Deshmukh) यांना केंद्रीय गुन्हे अन्वेषण विभागानं (सीबीआय) समन्स पाठवलं आहे. सीबीआयकडून अनिल देशमुख यांची 14 एप्रिलला चौकशी करण्यात येणार आहे. याप्रकरणी राष्ट्रवादी काँग्रेसने आपली अधिकृत भूमिका मांडली आहे. अनिल देशमुख यांनी काहीही चुकीचं केलेलं नाही. त्यामुळे, सीबीआय चौकशीसाठी ते हजर राहणार असल्याचं राष्ट्रवादीचे प्रवक्ते नवाब मलिक यांनी सांगितले.
मुंबईचे माजी पोलीस आयुक्त परमबीर सिंग यांनी केलेल्या आरोपांवर त्यांची 14 एप्रिलला चौकशी करण्यात येणार आहे. अनिल देशमुख यांच्या स्वीय सहायकांची सीबीआयकडून रविवारी चौकशी करण्यात आली होती. त्यानंतर आता अनिल देशमुख यांनाही सीबीआयनं समन्स धाडलं आहे. (CBI has summoned former Maharashtra Home Minister Anil Deshmukh on 14th April) त्यानंतर, राष्ट्रवादीने पक्षाची अधिकृत भूमिका जाहीर केली आहे.
राष्ट्रवादी काँग्रेसचे नेते नवाब मलिक यांनी यासंबंधी माहिती दिली. त्यानुसार, अनिल देशमुख यांनी काहीही चुकीचं काम केलं नाही. त्यामुळे, 14 एप्रिल रोजी ते सीबीआय चौकशीला हजर राहतील. सीबीआयच्या तपासाला ते पूर्णपणे सहकार्य करतील, लवकरच सत्य बाहेर येईल, असेही मलिक यांनी सांगितले.
महाराष्ट्र के पूर्व गृह मंत्री अनिल देशमुख को समन प्राप्त हुआ है, वे निश्चित तौर पर CBI कार्यालय जाएंगे और जांच में सहयोग करेंगे हमें पूरी उम्मीद है कि उन्होंने कोई गलत काम नहीं किया। सच्चाई सामने आएगी: नवाब मलिक, NCP pic.twitter.com/i5Ia7hPqPy
— ANI_HindiNews (@AHindinews) April 12, 2021
सीबीआयच्या तपास पथकाकडून रविवारी अनिल देशमुख यांचे खासगी सचिव संजीव पलांडे व साहाय्यक एस. कुंदन यांची कसून चौकशी केली होती. सुमारे चार तास त्यांचा स्वतंत्रपणे जबाब नोंदविण्यात आला होता. त्यानंतर अनिल देशमुख यांचा जबाब नोंदवला जाण्याची शक्यता वर्तविण्यात आली होती.
माजी पोलीस आयुक्त परमबीर सिंग यांनी देशमुख यांनी दरमहा १०० कोटी रुपये वसुलीचे टार्गेट दिल्याच्या केलेल्या आरोपाबाबत गेल्या सहा दिवसांपासून सीबीआय चौकशी करत आहे. आणखी आठ दिवसांमध्ये प्राथमिक चौकशी पूर्ण करून त्यांना उच्च न्यायालयात अहवाल सादर करायचा आहे. त्यामुळे हे प्रकरण माजी गृहमंत्री देशमुख यांना अडचणीचे ठरण्याची शक्यता आहे. या प्रकरणात आतापर्यंत मुंबईचे माजी पोलीस आयुक्त परमबीर सिंग, मुंबई गुन्हे अन्वेषण शाखेच्या अंमलबजावणी विभागाचे उपायुक्त राजू भुजबळ आणि साहाय्यक आयुक्त संजय पाटील तसेच एनआयएच्या अटकेतील सचिन वाझेची चौकशी करण्यात आली आहे.
