कोल्हापूर महापालिकेत बोंद्रे, जाधव, देशमुख, फरास बनले नवे गटनेते

कोल्हापूर : महानगरपालिका सभागृहातील कामकाज शिस्तबद्ध, कायदेशीर तसेच सांघिक पद्धतीने होण्याच्या दृष्टीने महत्त्वाचा भाग असलेल्या गटनेत्यांची निवड प्रक्रिया पक्षीय पातळीवर पार पडली. सभागृहात त्या त्या पक्षाचे प्रतिनिधित्व करणाऱ्या गटनेत्यांनी आता विभागीय आयुक्त कार्यालयाकडे आघाडी म्हणून नोंदणी करायची आहे. त्यापैकी काँग्रेस पक्षाने मंगळवारी आघाडीची नोंदणी केली.

महानगरपालिकेच्या सभागृहातील सर्वच कामकाज कायदेशीर पद्धतीने चालावे म्हणून आघाडीची नोंदणी करणे आवश्यक आहे. जे पक्ष त्यांच्या नगरसेवकांच्या नावासह नोंदणी करतील, त्या पक्षांना कायदेशीर संरक्षण मिळणार आहे. पक्षांतर बंदी कायद्याखाली सर्व नगरसेवक बांधले जाणार आहेत. ज्या पक्षाची अशी नोंदणी होणार नाही त्यांच्या नगरसेवकांना प्रत्येक निवडणुकीत वेगवेगळी भूमिका घेण्यास मुभा मिळणार आहे. ही नोंदणी गटनेत्याने करायची असते. त्यासाठी आधी गटनेता निश्चित करावा लागतो.

काँग्रेस पक्षाने दुसऱ्यांदा महापालिकेवर निवडून आलेल्या इंद्रजीत पंडितराव बाेंद्रे यांची काँग्रेसच्या गटनेतेपदी निवड करण्यात आली. पुण्यातील विभागीय आयुक्त कार्यालयात महाराष्ट्र स्थानिक प्राधिकरण सदस्य अर्हता नियम १९८७ मधील नियम तीन नुसार काँग्रेसच्या सर्व नगरसेवकांच्या गटाची नोंदणी विभागीय आयुक्त डॉ. चंद्रकांत पुलकुंडवार, सहआयुक्त चंद्रकांत खोसे व उपायुक्त प्रतिभा पाटील यांच्या उपस्थितीत करण्यात आली.

भारतीय जनता पक्षाने त्यांच्या पक्षाच्या गटनेतेपदी ज्येष्ठ नगरसेवक मुरलीधर पांडुरंग जाधव यांची निवड केली आहे. शुक्रवारी सर्व नगरसेवकांची बैठक झाली, त्यावेळी गटनेता व सभागृह नेता कोणाला करायचे त्यांची नावे बंद लखोट्यात घालून देण्यास सांगण्यात आले होते. त्यानंतर बंद लखोटे महाराष्ट्र प्रदेश कार्यालयाकडे पाठविले होते. प्रदेशाध्यक्ष रविंद्र चव्हाण यांनी सोमवारी मुरलीधर जाधव यांची गटनेतेपदी निवड केली. तसे पत्र त्यांनी महानगर जिल्हाध्यक्ष विजय जाधव यांना पाठविले.

महायुतीतील घटक पक्ष असलेल्या शिंदेसेनेच्या गटनेतेपदी ज्येष्ठ व अनुभवी नगरसेवक शारंगधर देशमुख व राष्ट्रवादी अजित पवार पक्षाचे गटनेते म्हणून आदिल फरास यांची निवड करण्यात आली आहे. प्रजासत्ताकदिनी या घोषणा करण्यात आल्या. भाजप, शिंदेसेना, राष्ट्रवादी यांची नोंदणी आज, बुधवारी होणार आहे.