दुचाकी चोरणाऱ्या सराईत आरोपीला अटक, ५ गुन्ह्यांची उकल, लाखोंचा मुद्देमाल हस्तगत

दुचाकी चोरी करणाऱ्या एका सराईत गुन्हेगाराला अटक करण्यात पेल्हारच्या गुन्हे प्रकटीकरण शाखेच्या पोलिसांना यश मिळाले आहे. आरोपीकडून ५ गुन्ह्यांची उकल करून १ लाख ७२ हजार रुपये किंमतीच्या चोरीच्या ३ दुचाकी आणि इतर दुचाकींचे पार्टही हस्तगत केल्याची माहिती जनसंपर्क अधिकारी व सपोनि शिवकुमार गायकवाड यांनी शुक्रवारी दिली आहे.

वाकणपाडा येथे राहणाऱ्या अजयकुमार यादव (२६) या तरुणाने ४ मे रोजी आयान मेडीकलच्या समोर पार्किंग केलेली दुचाकी चोरट्याने चोरून नेली होती. याप्रकरणी पेल्हार पोलिसांनी वाहन चोरीचा गुन्हा दाखल केला होता. पेल्हार पोलीस ठाण्याच्या हद्दीत वारंवार होणाऱ्या दुचाकी चोरीच्या गुन्ह्याचे गांभीर्य लक्षात घेऊन पेल्हारचे वरिष्ठ पोलीस निरीक्षक जितेंद्र वनकोटी यांनी गुन्हे प्रकटीकारण पथकातील अधिकारी व अंमलदार यांना चोरी झालेल्या दुचाकींचा व आरोपींचा छडा लावण्यासाठी योग्य त्या सूचना दिल्या होत्या.

त्यानुसार पेल्हारच्या गुन्हे प्रकटीकरण पथकाचे अधिकारी व अंमलदार यांनी हद्दीत उघड दुचाकी चोरीचे गुन्ह्यांच्या घटनास्थळी भेट दिली. त्याठिकाणी गुन्ह्यांचा कौशल्यपूर्ण तपास करुन दुचाकी चोरणारा वसीम शेख असल्याची खात्रीशीर माहीती प्राप्त केली. त्यानुसार वसिम शेख (३०) याला तो चालवत असलेल्या गॅरेज मधून ताब्यात घेतले. त्याच्याकडे केलेल्या कौशल्यपुर्ण तपासात त्याने पेल्हारच्या हद्दीत मागील दोन महिन्यात ५ दुचाकी चोरी करून त्यापैकी २ दुचाकी कटिंग केल्या. आरोपीकडून पोलिसांनी ५ गुन्ह्यांची उकल करून १ लाख ७२ हजार रुपये किंमतीच्या ३ दुचाकी व इतर दुचाकीचे पार्ट हस्तगत केले आहे.

सदरची कामगिरी पोलीस उपायुक्त जयंत बजबळे, सहायक पोलीस आयुक्त बजरंग देसाई यांचे मार्गदर्शनाखाली पेल्हारचे वरिष्ठ पोलीस निरीक्षक जितेंद्र वनकोटी, पोलीस निरीक्षक दिलीप राख व शकील शेख, गुन्हे प्रकटीकरण पथकाचे सपोनि रमेश वाघचौरे, पोलीस उपनिरीक्षक तुकाराम भोपळे, सहा फौजदार योगेश देशमुख, पोलीस हवालदार तानाजी चव्हाण, अनिल शेगर, वाल्मिक पाटील, मिथुन मोहिते, रवि वानखेडे, किरण आव्हाड, दिलदार शेख, अभिजित नेवारे आणि वसीम शेख यांनी केली आहे.