ट्वेंटी-२० वर्ल्ड कपच्या तयारीला सारे संघ लागले आहेत. विराट कोहली, रोहित शर्मा हे भारताचे स्टार ट्वेंटी-२० क्रिकेटमध्ये सर्वाधिक धावा करणारे फलंदाज आहेत. पाकिस्तानचा बाबर आजम याचा फॉर्म हा प्रतिस्पर्धींची चिंता वाढवणारा नक्की आहे. त्यामुळेच आता वर्ल्ड कप स्पर्धा कोण गाजवतंय याची सर्वांनाचा उत्सुकता आहे.
ऑस्ट्रेलियाचा माजी दिग्गज शेन वॉटसन ( Australia great Shane Watson) याला ट्वेंटी-२० फॉरमॅटमधील जगातील सर्वोत्तम खेळाडूंचा संघ निवडण्याचा टास्क दिला, परंतु त्याने पाचच खेळाडूंची निवड केली. त्याने निवडलेल्या खेळाडूंमध्ये दोन पाकिस्तानी खेळाडूंचा समावेश असल्याने सर्वांना आश्चर्याचा धक्का बसला. भारताचे दोन स्टार विराट व रोहित हे त्याच्या यादीत नाहीत.
१६ ऑक्टोबर ते १३ नोव्हेंबर या कालावधीत ऑस्ट्रेलियात ट्वेंटी-२० वर्ल्ड कप होणार आहे. भारत-पाकिस्तनाला ग्रुप २ मध्ये ठेवण्यात आले असून २३ ऑक्टोबरला हाय व्होल्टेज सामना रंगणार आहे.
बाबर आजम ( Babar Azam) - ''सर्वप्रथम मी बाबर आजमची निवड करीन. जागतिक क्रमवारीत तो अव्वल क्रमांकाचा फलंदाज आहे आणि वर्चस्व कसे गाजवायचे हे त्याला माहित्येय. फार धोका न पत्करता धावांचा पाऊस कसा पाडायचा हे त्याला योग्यरितीने जमते. ऑस्ट्रेलियात त्याची बॅट बोलणार. ऑस्ट्रेलियातील परिस्थितीसाठी त्याने त्याच्या फलंदाजीचे तंत्र विकसित केले आहे,''असे वॉटसन म्हणाला.
सूर्यकुमार यादव ( Suryakumar Yadav ) - ''सूर्यकुमार यादवची फलंदाजी अविश्वसनीय आहे आणि तो माझा दुसऱ्या क्रमांकाची निवड आहे. पण, ऑस्ट्रेलियात होणाऱ्या ट्वेंटी-२० वर्ल्ड कपमध्ये लोकेश राहुलने दमदार कामगिरी केल्यास, मला त्याचे आश्चर्य वाटणार नाही. ऑस्ट्रेलियन कंडिशनचा त्याला चांगला अभ्यास आहे, ''असे वॉटसनने सांगितले.
डेव्हिड वॉर्नर ( David Warner ) - वॉटसन म्हणाला, मागील ट्वेंटी-२० वर्ल्ड कप स्पर्धेतील विजेत्या ऑसीसंघाच्या या फलंदाजाने प्लेअर ऑफ दी टुर्नामेंटचा किताब पटकावला आणि दिल्ली कॅपिटल्सकडून आयपीएलमध्येही त्याने चांगल्या धावा केल्या आहेत. त्यामुळे घरच्या मैदानावर तो चौकार-षटकारांची आतषबाजी करेल. त्यासाठी सज्ज राहा.
जोस बटलर ( Jos Buttler) - इंग्लंडच्या जोस बटलरचीही वॉटसनने निवड केली आहे. तो म्हणाला, आयपीएलमध्ये त्याला बाद करणे अवघड झाले होते. आयपीएलच्या एका पर्वात चार शतकं त्याने केली आहेत आणि विराट कोहलीनंतर ( २०१६) असा पराक्रम करणारा तो पहिलाच फलंदाज आहे. त्याची जेव्हा बॅट तळपते तेव्हा त्याला रोखणे अवघड आहे. स्टेडियमवर त्याला हवे तिथे तो चेंडू टोलावू शकतो. बिग बॅशमुळे ऑस्ट्रेलियातील खेळपट्टी व कंडिशन त्याला चांगली माहित्येय.
शाहिन आफ्रिदी ( Shaheen Afridi) - पाच खेळाडूंमध्ये वॉटसनने पाचव्या क्रमांकावर पाकिस्तानी गोलंदाज शाहिन आफ्रिदी याची निवड केली आहे. मागील ट्वेंटी-२० वर्ल्ड कप स्पर्धेत त्याने त्याच्या गोलंदाजीने प्रभावित केल्याचे वॉटसन म्हणाला. पण, सुरुवातीला विकेट घेण्यात तो अपयशी ठरला, तर त्याची लय बिघडेल, याची चिंता वॉटसनला वाटतेय. 1