इंग्लंडविरुद्धच्या बर्मिंगहॅम कसोटी सामन्यात मोहम्मद सिराजनं इंग्लंडच्या मैदानात सर्वोत्तम कामगिरी नोंदवताना ६ विकेट्स आपल्या खात्यात जमा केल्या.
बर्मिंगहॅम येथील एजबॅस्टनच्या मैदानात कसोटी कारकिर्दीतील चौथा 'पंजा' मारताना यजमान संघाच्या पहिल्या डावात ७० धावा खर्च करत त्याने ६ विकेट्स घेतल्या. ही त्याची आतापर्यंतची दुसऱ्या क्रमांकाची सर्वोच्च कामगिरी ठरली.
२०२१ मध्ये ऑस्ट्रेलिया विरुद्धच्या ब्रिस्बेन कसोटी सामन्यात त्याने पहिल्यांदा पाच विकेट्सचा डाव साधला होता. १९.५ षटकात ७३ धावा खर्च करत त्याने ऑस्ट्रेलियाचा अर्धा संघ तंबूत धाडला होता.
जुलै २०२३ मध्ये मोहम्मद सिराजनं वेस्ट इंडिज विरुद्धच्या कसोटी सामन्यात ६० धावांत ५ विकेट्स घेत दुसऱ्यांदा पाच विकेट्स घेतल्या होत्या.
२०२४ मध्ये दक्षिण आफ्रिकेविरुद्धच्या केपटाऊन कसोटीत मोहम्मद सिराजनं आपल्या गोलंदाजीतील धार दाखवली होती. या कसोटी सामन्यात त्याने १५ धावा खर्च करत ६ विकेट्स घेतल्या होत्या. कसोटी कारकिर्दीतील ही त्याची सर्वोत्तम कामगिरी आहे.
एजबॅस्टनच्या मैदानातील कामगिरीसह दक्षिण आफ्रिका आणि इंग्लंडच्या मैदानात ६ विकेट्स हॉलचा पराक्रम करणारा तो पहिला भारतीय गोलंदाज ठरला आहे. जसप्रीत बुमरासह अन्य कोणत्याही भारतीय गोलंदाजाला या दोन्ही देशांत एका डावात ६ विकेट्सचा डाव साधता आलेला नाही.
सिराजशिवाय इशांत शर्मा, अमर सिंह, भागवत चंद्रशेखर, चेतन शर्मा, भुवनेश्वर कुमार, दिलीप दोशी, बिशन सिंग बेदी या आठ गोलंदाजांनी इंग्लंडच्या मैदानात एका डावात ६ विकेट्स घेण्याचा डाव साधला आहे.
जसप्रीत बुमराह, शार्दुल ठाकुर, हरभजन सिंग, अनिल कुंबळे, जवागल श्रीनाथ, रवींद्र जडेजा, आणि सिराज या ७ गोलंदाजांनी दक्षिण आफ्रिकेच्या मैदानात कसोटीतील एका डावात ६ विकेट्स घेतल्या आहेत.
SENA देशांत (दक्षिण आफ्रिका, इंग्लंड, न्यूझीलंड आणि ऑस्ट्रेलिया) सिराजनं दक्षिण आफ्रिका आणि इंग्लंडमध्ये तर जसप्रीत बुमराहनं ऑस्ट्रेलिया आणि दक्षिण आफ्रिकेच्या मैदानात ६ विकेट्स घेतल्याचा रेकॉर्ड आहे.