पदार्पणवीर श्रेयस अय्यर, रवींद्र जडेजा आणि शुबमन गिल यांच्या उत्तम खेळीनंतर टीम इंडियानं कानपूर कसोटीमध्ये ३४५ धावांचा डोंगर उभा केला. न्यूझीलंडच्या कायले जेमिन्सननं तीन विकेट्स घेत टीम इंडियाला सुरुवातीला धक्के दिले, परंतु अय्यर व जडेजा यांनी पाचव्या विकेटसाठी शतकी भागीदारी करताना टीम इंडियाचा डाव सावरला. दरम्यान, पहिल्या दिवसाचा खेळ सुरू असताना सोशल मीडियावर #KanpurTest हा हॅशटॅग ट्रेंड होऊ लागला होता. पण, हा ट्रेंड कुण्या खेळाडूमुळे नाही, तर एका व्यक्तिमुळे सुरू झालेला. भारताचा माजी सलामीवीर वासीम जाफर यानंही या व्यक्तीची दखल घेत एक त्याची फिरकी घेतली आहे.
सामन्याच्या पहिल्या दिवशी मैदानावर सामना पाहण्यासाठी आलेल्या प्रेक्षकांची मोठी गर्दी होती. या प्रेक्षकांमधील एक व्यक्ती मोठ्या प्रमाणात प्रसिद्ध झाली आहे. सामन्या दरम्यान कॅमेरामनची नजर एका व्हिडीओवर गेली आणि ती व्यक्ती सोशल मीडियावर फेमस झाली. थेट प्रक्षेपणादरम्यान स्टेडियममध्ये बसललेली एक व्यक्ती तोंडात गुटखा किंवा सुपारी सारखी काही गोष्ट खात असल्याची चर्चा सोश मीडियावर सुरू आहे. ही क्लिप मोठ्या प्रमाणात व्हायरल झाली. त्यातच ही व्यक्ती खाताखाता फोनवरही बोलताना दिसतेय.