मुंबई : विराट कोहलीने 2018 मध्ये धावांची आतषबाजी करताना विक्रमांचा पाऊस पाडला. त्यामुळेच त्याला आंतरराष्ट्रीय क्रिकेट परिषदेने ( आयसीसी) 2018 चा सर्वोत्तम खेळाडूचा पुरस्कार जाहीर केला. याशिवाय वन डे व कसोटीतील सर्वोत्तम खेळाडूचा मानही त्याने पटकावला. सर्वोत्तम कसोटी खेळाडूचा पुरस्कार कोहलीने प्रथमच जिंकला आहे, तर त्याने सलग दुसऱ्यांदा वन डेतील सर्वोत्तम खेळाडूचा पुरस्कार पटकावला. कोहलीने गतवर्षी सर गार्फिल्ड ट्रॉफी आणि वन डेतील सर्वोत्तम खेळाडूचा पुरस्कार जिंकला होता. कोहलीने या कामगिरीबरोबर महान फलंदाज सचिन तेंडुलकर आणि राहुल द्रविड यांना न जमलेली गोष्ट करून दाखवली.
आयसीसीचा सर्वोत्तम क्रिकेटपटूचा पुरस्कार जिंकणारा कोहली हा चौथा भारतीय खेळाडू आहे. यापूर्वी राहुल द्रविड ( 2004), सचिन तेंडुलकर ( 2010) आणि आर अश्विन ( 2016) यांनी हा मान पटकावला. हा मान दोन वेळा जिंकण्याचा पराक्रम त्यांना करता आला नाही आणि तो कोहलीने करून दाखवला. कोहलीने 2017 मध्ये सर्वोत्तम क्रिकेटपटूचा पुरस्कार जिंकला होता.