Kane Richardson Retired: ऑस्ट्रेलियाचा अनुभवी वेगवान गोलंदाज केन रिचर्डसन याने सर्व प्रकारच्या व्यावसायिक क्रिकेटमधून निवृत्ती जाहीर केली आहे. वयाच्या ३४ व्या वर्षी त्याने हा निर्णय घेतला. रिचर्डसन हा ऑस्ट्रेलियन मर्यादित षटकांच्या क्रिकेटमधील महत्त्वाचा गोलंदाज मानला जायचा. त्याच्या निवृत्तीमुळे ऑस्ट्रेलियन क्रिकेट वर्तुळातून त्याच्याबद्दल आदर व्यक्त केला जात आहे. सततच्या दुखापती हे निवृत्तीमागचे मुख्य कारण असल्याचे सांगितले जात आहे. भारतात खेळलेला सामना हा त्याचा शेवटचा आंतरराष्ट्रीय क्रिकेट सामना ठरला.
२०१३ पासून झालेली सुरुवात
रिचर्डसनने २०१३ मध्ये श्रीलंकेविरुद्ध आंतरराष्ट्रीय पदार्पण केले होते. त्याने ऑस्ट्रेलियासाठी एकूण ६१ आंतरराष्ट्रीय सामने खेळले. त्यात त्याने ८४ बळी घेतले. त्याने २५ एकदिवसीय सामन्यांत ३९ बळी मिळवले, तर ३६ टी२० सामन्यांत ४५ बळी घेतले. विशेष म्हणजे, त्याने आपला शेवटचा आंतरराष्ट्रीय सामना २०२३ मध्ये भारताच्या गुवाहाटी येथे खेळला होता.
IPL आणि इतर टी२० लीग्स
केन रिचर्डसनने जगभरातील टी२० लीगमध्ये नाव कमावले. आयपीएलमध्ये तो राजस्थान रॉयल्स, रॉयल चॅलेंजर्स बेंगळुरू आणि पुणे वॉरियर्स या संघांकडून खेळला. २०१३ मध्ये पुणे वॉरियर्स इंडिया कडून आयपीएलमध्ये पदार्पण केले. त्याने आतापर्यंत १५ आयपीएल सामन्यांत १९ बळी घेतले. १३ धावांत ३ बळी ही त्याची सर्वोत्तम कामगिरी आहे. २०२१ च्या हंगामासाठी आरसीबीने त्याला ४ कोटी रुपयांना विकत घेतले होते, परंतु वैयक्तिक कारणांमुळे आणि दुखापतींमुळे त्याला जास्त सामने खेळता आले नाहीत. तसेच, त्याने बिग बॅश लीगमध्ये (BBL) ११८ सामन्यांत १४२ बळी घेतले. केन रिचर्डसनने आपल्या १७ वर्षांच्या व्यावसायिक करिअरमध्ये सर्वाधिक २०१ टी२० सामने खेळले असून त्यात एकूण २४१ बळी घेतले.
