नवी दिल्ली - भारताचा अनुभवी फलंदाज लोकेश राहुलने कबूल केले की, त्याच्या मनात निवृत्तीचा विचार आला होता. मात्र, अद्याप निवृत्तीसाठी काही काळ बाकी असल्याचे सांगत, जेव्हा योग्य वेळ येईल तेव्हा आपण त्यास उशीर करणार नाही, असे त्याने स्पष्ट केले आहे.
इंग्लंडचा माजी कर्णधार केविन पीटरसनसोबतच्या संवादात राहुलने आपल्या भविष्यातील योजनांवर प्रकाश टाकला. तो म्हणाला, ‘निवृत्ती घेणे हा माझ्यासाठी कठीण निर्णय नसेल, कारण क्रिकेटपलीकडेही आयुष्य आहे. मी निवृत्तीबाबत विचार केला आहे. मला वाटत नाही की हा निर्णय घेणे इतके कठीण असेल. जर तुम्ही स्वतःशी प्रामाणिक असाल, तर जेव्हा वेळ येईल तेव्हा ती टाळण्यात काही अर्थ उरणार नाही. अर्थात, याला अजून काही वेळ लागेल.’
राहुल स्वतःला ‘सुपरस्टार’ न मानण्यावर भर देत म्हणाला, ‘तुमच्याकडे जे काही आहे, त्याचा आनंद घ्या. तुमचे कुटुंबही आहे, त्यामुळे तुम्हाला जे आवडते तेच करा. मी स्वतःला हे समजावण्याचा प्रयत्न करतो की मी खूप महत्त्वाचा नाही. आपल्या देशात आणि जगभरात क्रिकेट सुरूच राहणार आहे.’
