KL Rahul: द.आफ्रिकेविरुद्ध केएल राहुल इतिहास रचणार? मोठ्या विक्रमापासून फक्त १५ धावा दूर!

IND vs SA Test Series: दक्षिण आफ्रिकेविरुद्धच्या पहिल्या कसोटी सामन्यात केएल राहुलकडे मोठ्या विक्रमाला गवसणी घालण्याची संधी आहे.

भारत आणि दक्षिण आफ्रिका यांच्यातील दोन सामन्यांच्या कसोटी मालिकेतील पहिला सामना उद्या, १४ नोव्हेंबर रोजी कोलकाता येथील प्रतिष्ठित ईडन गार्डन्स स्टेडियमवर खेळला जाणार आहे. जागतिक कसोटी अजिंक्यपद स्पर्धेच्या चौथ्या आवृत्तीसाठी ही मालिका दोन्ही संघांसाठी अत्यंत महत्त्वाची आहे. या कसोटीत, भारतीय संघाचा सलामीवीर फलंदाज केएल राहुल याला त्याच्या कारकिर्दीतील एक मोठा टप्पा गाठण्याची संधी आहे.

केएल राहुलने आतापर्यंत ६५ कसोटी सामन्यांतील ११४ डावांमध्ये ३६.५५ च्या सरासरीने ३९८५ धावा केल्या आहेत. यामध्ये ११ शतके आणि २० अर्धशतकांचा समावेश आहे. जर राहुलने कोलकाता कसोटीत दक्षिण आफ्रिकेविरुद्ध आणखी १५ धावा केल्या, तर तो कसोटी क्रिकेटमध्ये त्याच्या ४,००० धावा पूर्ण करेल आणि अशी कामगिरी करणारा तो १८ वा भारतीय फलंदाज ठरेल.

२०२५ मधील जबरदस्त फॉर्म

२०२५ या कॅलेंडर वर्षात केएल राहुलचा कसोटी फॉर्म उत्कृष्ट राहिला आहे. त्याने या वर्षात खेळलेल्या आठ कसोटी सामन्यांतील १५ डावांमध्ये ५३.२१ च्या प्रभावी सरासरीने ७४५ धावा केल्या आहेत. यात तीन शतके आणि तीन अर्धशतकांचा समावेश आहे. या जबरदस्त फॉर्ममुळे, तो वर्षातील या शेवटच्या दोन कसोटी सामन्यांमध्येही आपली कामगिरी कायम ठेवण्याचा प्रयत्न करेल.

दक्षिण आफ्रिकेविरुद्धची आकडेवारी

दक्षिण आफ्रिकेविरुद्ध कसोटी सामन्यात केएल राहुलचे आकडे मात्र थोडे निराशाजनक आहेत. त्याने दक्षिण आफ्रिकेविरुद्ध सात कसोटी सामने खेळले आहेत, ज्यात १३ डावांमध्ये त्याची सरासरी २८.३८ आहे आणि त्याने ३६९ धावा केल्या आहेत. यामध्ये दोन शतक आणि एका अर्धशतकाचा समावेश आहे.

ईडन गार्डन्सवरील कामगिरी

कोलकात्याच्या ईडन गार्डन्स स्टेडियमवर राहुलने फक्त एकच कसोटी सामना खेळला आहे, ज्यात त्याने दोन डावांमध्ये एकूण ७९ धावा केल्या होत्या. त्यामुळे, जागतिक कसोटी अजिंक्यपद स्पर्धेच्या दृष्टीने महत्त्वाच्या असलेल्या या मालिकेत, केएल राहुल त्याच्या वैयक्तिक कामगिरीचा ४,००० धावांचा टप्पा कसा पूर्ण करतो आणि संघाला कशी सुरुवात करून देतो, हे पाहणे क्रिकेट रसिकांसाठी महत्त्वाचे ठरणार आहे.