Ishan Kishan IPL 2022 MI vs DC Live: दिल्ली विरूद्धच्या हंगामातील पहिल्याच सामन्यात Mumbai Indians चा पैसा वसूल झाला. तब्बल १५.२५ कोटींची रक्कम देऊन विकत घेतलेल्या इशान किशनने संपूर्ण २० षटकं खेळत धडाकेबाज ८१ धावांची खेळी केली. रोहित शर्माने दमदार सुरूवात केली होती, पण तो बाद झाल्यावर इशान किशनने जबाबदारी स्वत:च्या खांद्यावर घेत तुफान फटकेबाजी केली. त्याच्या खेळीमुळेच मुंबईने २० षटकात ५ बाद १७७ पर्यंत मजल मारली.
मुंबई इंडियन्सचा कर्णधार रोहित शर्मा आणि अनुभवी सलामीवीर इशान किशन या दोघांनी संघाला दमदार सुरूवात करून दिली. पॉवर प्ले संपेपर्यंत त्यांनी अर्धशतकी मजल मारली. रोहित वेगाने फलंदाजी करत असताना ३२ चेंडूत ४ चौकार आणि २ षटकारांसह ४१ धावांवर बाद झाला. अनमोलप्रीत सिंग (८) स्वस्तात बाद झाला. एन तिलक वर्माने ३ चौकार मारले पण तो २२ धावांवर माघारी परतला.
मुंबईचा सर्वात अनुभवी खेळाडू किरॉन पोलार्डने चाहत्यांची निराशा केली. त्याने ६ चेंडूत केवळ ३ धावा केल्या आणि झेलबाद झाला. हार्दिक पांड्याच्या जागी फिनिशरची भूमिका दिली गेलेला टीम डेव्हिडदेखील फारसा प्रभाव पाडू शकला नाही. पण इशान किशनने मात्र नाबाद ८१ धावा कुटल्या.