भारतीय महिला क्रिकेट संघाच्या चाहत्यांसाठी एक मोठी आणि आनंदाची बातमी समोर आली आहे. विमेन्स प्रीमियर लीगचा थरार संपल्यानंतर भारतीय महिला संघ दक्षिण आफ्रिकेच्या दौऱ्यावर जाणार आहे. क्रिकेट दक्षिण आफ्रिकाने या दौऱ्याचे अधिकृत वेळापत्रक जाहीर केले असून, यामध्ये पाच सामन्यांची टी-२० मालिका खेळवली जाणार आहे.
ही मालिका दोन्ही संघांसाठी अत्यंत महत्त्वाची ठरणार आहे. जून २०२६ मध्ये इंग्लंडमध्ये होणाऱ्या आयसीसी महिला टी-२० विश्वचषकापूर्वीची ही शेवटची अधिकृत मालिका असेल. विशेष म्हणजे, विश्वचषकाच्या गट-१ मध्ये भारत आणि दक्षिण आफ्रिका एकाच गटात आहेत, त्यामुळे या मालिकेतील कामगिरी दोन्ही संघांचा आत्मविश्वास वाढवणारी ठरेल.
"भारतासारख्या संघाविरुद्ध खेळल्यामुळे आमच्या संघाला स्वतःची चाचणी घेण्याची आणि उणिवा सुधारण्याची उत्तम संधी मिळेल", असे सीएसएचे संचालक एनॉक एनक्वे यांनी म्हटले आहे. तर, सीएसएचे सीईओ फोलेत्सी मोसेकी यांनी म्हटले आहे की, "भारताचे यजमानपद भूषवताना आम्हाला अभिमान वाटतोय. ही मालिका जागतिक दर्जाची असेल आणि यामुळे महिला क्रिकेटचा प्रसार होण्यास मदत होईल.
भारतीय महिला संघाचा दक्षिण आफ्रिका दौरा: टी-२० मालिकेचं वेळापत्रक
| सामना | तारीख | मैदान | शहर |
| पहिला सामना | १७ एप्रिल २०२६ | किंग्जमीड क्रिकेट ग्राउंड | डर्बन |
| दुसरा सामना | १९ एप्रिल २०२६ | किंग्जमीड क्रिकेट ग्राउंड | डर्बन |
| तिसरा सामना | २२ एप्रिल २०२६ | वँडरर्स स्टेडियम | जोहान्सबर्ग |
| चौथा सामना | २५ एप्रिल २०२६ | वँडरर्स स्टेडियम | जोहान्सबर्ग |
| पाचवा सामना | २७ एप्रिल २०२६ | विलोमूर पार्क | बेनोनी |